በኩረ ትንሣኤ

እንኳዕ ናብ ብርሃነ ትንሣኤ ብሰላም ኣብጽሓና

ወተንሥአ እግዚአብሔር ከምዘንቃህ እምንዋም ወከመ ኃይል ወኅዳገ ወይን ወቀተለ ጸሮ በድህሬሁ      መዝ. ፸፯፡፹፭-፹፮ (78፣85-86።)

ዮሓ.20፣1-19። ግ.ሓዋ.2፣22-26። 1ይቆሮ.15-1-20። 1ይጴጥ.1፣1-13።

ቅዳሴ ፣ ዲዮስቆሮስ ( እምቅድመ ዓለም)

ወንጌል ማቴ. 28፣1-ፍጻሜ ማር.16፣1-ፍጻሜ ሉቃ.24፣1-16

በኩረ ትንሣኤ

ይትፌሳህ ሰማይ ወትትሐሰይ ምድር ዛቲ ዕለት እንተ ገብረ እግዚአብሔር ንትፈሳህ ወትሐሰይ ባቲ

ኦ እግዚኦ ኣድኅንሶ (መዝ.፻፲፯፡፳፬\ (118-24) ።

ዎ እግዚኣብሔር ዝገበራ መዓልቲ እዚኣ እያ፡ ብእኣ ንተሐጐስን ባህ ይበለናን። ዎ እግዚኣብሔር ኣድሕን ኰታ።

በኩረ ትንሣኤ

ትንሣኤ ዝብል ቃል ካብ ተንሥአ ዝብል ናይ ግእዝ ቃል ዝተረኽበ እዩ። ትርጉሙ ከኣ ምትንሣእ ማለት እዩ። ብናይ ቤተክርስቲያና ትምህርቲ ትንሣኤ ናይ ሙታን ምትንሣኣ ፣ ብሞት ተፈላልዮም ዝነብሩ  ነፍስን ሥጋን ምርኻብ፣ ምጽኣተ ጎይትና መድኃኒና ኢየሱስ ክርስቶስን ካልኦት ትርጉማትን የመልክት። በኩረ ዝብል ቃል ድማ ናይ ግእዝ ቃል ኮይኑ ቦኽሪ ወይ መጀመርያ ቀዳሚ ምዃኑ ዘርእይ እዩ።

ናይ ቁርስና በረኸት

በስመ አብ ወወልድ ወመንፈስ ቅዱስ አሃዱ አምላክ አሜን!

ካብ ምቅባልሲ ምሃብ ኣዝዩ ይባረኽ

ኣምላኽና መድኃኒና ኢየሱስ ክርስቶስ ኣብ መዋእለ ስብከቱ << ካብ ምቅባልሲ ምሃብ ኣዝዩ ይባረኽ ። ዝብል ቃል እንዳዘከርካ ከምዚ ጌርካ ምዕያይን ንድኹማት ምእላይን ከም ዚግባእ ።>> ግ.ሓዋ.20-35። ኢሉ ነጊሩናን ኣምሂሩናን እዩ።

ምሃብ ማለት ዓቢ በረከት እዩ። ካብቲ ዘለካ ትንኣስ ትዕበ ዝሃበ ካብ ኣምላኽ ዓቢ በረከት ይረክብ። ንመን ኢና ንህብ ንቤተክርስቲያን ፣ ንድኻታት ንጽጉማት ወዘተረፈ….

እግዚአብሔር ኣምላኽ ደቀይ ንበረከት ኩኑ ኢሉ። እዚ ዓቢ ምንጪ በረኸት ንዓና ሂቡና። ኣቦና ኣብርሃም ድምፂ እግዚአብሔር ሰሚዑ ቀሊጢፉ መልሲ ስለዝሃበ ንበረከት ኮይኑ በረከቱ ከኣ ንዕዑ ተፊሪ ንውሉድ ወለዶ ኮይኑ ዓቢ ክብርን ሞጎስን ኣብ ቅድሚ ኣምላኽና እግዚአብሔር ረኺቡ አብ ብዙኃን ኣብርሃም ተባሂሉ። ኩሎም ቅዱሳን አበው ጻውዒት ኣምላኽን ብምስማዕ ንበረከት ኮይኖም እዮም። በረኸቶም ከኣ ንዓና ተሪፉ።

ስለዚ ናይ እግዚአብሔር በረከት ኣብ ልዕሊ ፈተውቱን ኣቡኡ ዝእመኑን ኣዝዩ ብዙሕን ሙሉእን እዩ።

ሰሙነ ሕማማት

ቅድስቲ መሪና

በስመ ኣብ ወወልድ ወመንፈስ ቅዱስ ኣሃዱ ኣምላክ ኣሜን!

 ቅድስቲ መሪና ካብ ሃብታም ቤተስዝተወልደት እያ። ናይ መጀመርታ ስማ ማርያም እዩ። ኣዲኣ ገና ህጻን እንከላ እያ ብሞት ዝተፈለየታ። ድሕሪኡ አቡአ ንዓቕሚ ሄዋን ስጋብ ትበጽሕ ብጽቡቅ ሥን ምግባርን ፈሪሃ እግዚአብሔር እንዳምሃረ ኣዕቢይዋ። ብኹለንተና ዓቕሚ ሄዋን ምስ በጽሐትሉ፣ ንዓኣ ኣመሪዕዋ እሱ ናብ ገዳም ከይዱ ምስ መንኰሳት ክነብር ከምዝደሊ ምስ ነገራ ብጣዕሚ ኣምሪራ ነብዔት። << ኣቦይ ናትካ ነፍሲ ኣድሒንካ ናተይ ነፍሲ ምጥፋእ ከመይ ይኾነልካ?።>> ኢላቶ ። ኣቦኣ'ውን ኣነ ዝኸዶ ናብ ናይ ደቂ ተባዕትዮ መንኰሳት ገዳም እዩ ፣ ንስኺ ከኣ ጓል ኣንስተይቲ ኢኺ ኣየእትውኹን እዮም ምስበላ። ከም ወዲ ስረ ጌረ ጸጉረይ ተቆሪጸ ንወዲ ተባዕታይ መሲለ ምሳኻ ይኸይድ ኢላቶ። ዘለዎም ኩሉ ንብረት ሸይጦም ንድኻ ብምምጽዋት ስማውን ካብ ማርያም ናብ መሪና ቀይሩ፣ ተታሒዞም ናብ ገዳም ኣተዉ።

ኣብቲ ገዳም'ውን ብዓቢ ገድሊ እንዳተጋደሉ ነበሩ። ድሕሪ ዓሰርተ ዓመት ጽኑዕ ተጋድሎ ኣቡአ ብጣዕሚ ይሓሙ እሞ ናይቲ ገዳም ኣበምኔት ጸዊዖም ንወደይ ሓደራ ብዝኾነ መገዲ ካብ ገዳም ከይወጻኒ ኢሎም ንኣበምኔት ሓደራ ብምባል ይዓርፉ። ቅድስቲ መሪና'ውን ተጋድሎኣ ካብ ቅድም ብዝበለጸ ኣብዚሓ ክትተግህ ጀሚራ። ድሕሪ ነዊሕ እዋን ናይቲ ገዳም መንኰሳት እዚ መንኩሴ ስለምንታይ እዩ ምሳና ካብ ገዳም ወጻኢ ንተልእኾ ዘይወጽእ እንዳበሉ ነቲ ናይቲ ገዳም አበምኔት ምስ ኣጨንቅዎ እቲ ኣበምኔት ምስቶም መንኰሳት ንተልእኾ ንወጻኢ ክሰዳ ጀሚሩ ፣ እቶም ንተልእኾ ዝወጹ መነኰሳት ኩሉ ግዜ መግቦም ዝእክበሎም ናይ ሓደ ምእመን ገዛ ነበረ። ኩሉ ግዜ ክኸዱ ከለዉ መግቢ ትህቦም ናይቲ ምእመን ሓንቲ ጓል ነበረቶ።

ሰሙነ ሕማማት

በስመ አብ ወወልድ ወመንፈስ ቅዱስ አሃዱ ኣምላክ አሜን ።

ፍኖተ መስቀል

ፍኖተ መስቀል ማለት ጐይታና መድኃኒና ኢየሱስ ክርስቶስ ካብ
 ጲላጦስ ኣደባባይ ተበጊሱ ንመስቀሉ ተሰኪሙ ስጋብ ዝተሰቅለሉ
 እምባ ቀራንዮ ዝተጓዕዘሉ መገዲ ማለት እዩ። ጐይታና
 መድኃኒና  ኢየሱስ  ክርስቶስ ሓሙስ ምሸት ምስ ተታሕዘ 
ለይቲ ብሙሉኡ መከራ ክቅበል  ሓዲሩ ዓርቢ ንግሆ ናይ
 ኣይሁድ ሽማግሌታት ሓለቃታት ተኣኪቦም ናብ ቤት
 ሹም ናብ ጲላጦስ ሒዘምዎ ከዱ። ድሕሪኡ
 <<እዚ ሰብ ምስ ሕግና ዘይሰማማዕ ትምህርቲ ንህዝቢ የምህር ኣሎ'ሞ ብሕግና ሞት ይግብኦ።  ንጉሥ እየ  እንዳበለውን  የታልል  እዩ፣>>  ብምባል ኣብቲ ቅድሚ ሹም ቀሪቦም ከሰስዎ። ጲላጦስ ግና ብዙሕ እንተሓሰውዎን ተኸሰስዎን ኣይኣመኖምን ኔሩ። ምኽንያቱ መርሚሩ በደል ኣይረኸበሉን፣  ከድሕኖ'ውን  ሓሲቡ ኔሩ፣ ግና ኣይከኣለን።

ጲላጦስ  ንጐይታና  መድኃኒና  ኢየሱስ  ክርስቶስ  ክምርምሮ ንበይኑ ደው ኣቢሉ ኽሓቶ ናይ ሮማውያን ልምዲ ስለዝነበረ ናብ ኣዳራሽ ኣእቲዩ ንበይኑ ንዝተኸሰሉ ነገር ሓቲትዎ። ኣይሁድ ግና ኣብዚ ግዜ በዓለ ፋሲካ በጺሕዎም ስለ ዝነበረ ስለ ክብሪ በዓል ኢሎም  ናብ  ቤት  ፍርዲ  ኣይኣተዉን።    ኣብ  ደገ  ተኣኪቦም ነንሓድሕዶም ከምድሌቶምን ምንዮቶምን ንጐይታና መድኃኒና ኢየሱስ ክርስቶስ ንምስቃል ይሓስቡ ኔሮም። ጲላጦስ'ውን  ንጐይታና መድኃኒና ኢየሱስ ክርስቶስ ንበይኑ ድሕሪ ምምርማሩ ካብቲ ኣዳራሽ ወጺኡ ኣብዚ ሰብ ንሞት ዘብቅዕ በደል ኣይረኸብኩሉን እነሆልኩም ኢልዎም። ንሶም'ውን << ብሕግና መሰረት ሞት ዝግብኦ ሰብ እዩ። ንገዛእ ርእሱ ምስ እግዚአብሔር ማዕረ ጌሩ እዩ'ሞ ሞት ይግብኦ'ዩ። ስቀሎ፣ ስቀሎ >> እንዳበሉ መለስሉ። ንሱ'ውን ዳግማይ ንበይኑ መርሚሩ ዝሞተሉ በደል ከምዘይብሉ ፈሊጡ፣ ካብቲ ኣዳራሽ ንደገ ወጺኡ ኣብ ቅድሚ እቲ ህዝቢ ኢዱ ተሓጸበ። ካብዚ ሰብ ደም ንጹህ እየ ሞት ኣይፈርደሉን እየ ብምባል ንሓቒ መስከረ።