ምሳሌ መንግሰተ ሰማያት ማቴ 22፡1-14

በስመ አብ ወወልድ ወመንፈስ ቅዱስ አሃዱ አምላክ አሜን!!!

ምሳሌ መንግሰተ ሰማያት

ማቴ 22፡1-14

(Click to read PDF)ኣብ መጽናዕቲ መጽሓፍ ቅዱስ፡ ቃል እግዚኣብሔር ከነብበሉ ዝግበኣና ኣገባብ ብሕጽር ዝበለ ከምዚ ይመስል፡

1.     ብነጸላ ትርጉም፡ ንኣብነት ኣበ ብዙሃን ኣቦና ኣብርሃም፡ ካብ ካራን ናብ ከንኣን ዝገበሮ ጉዕዞ ወይ ድማ፡ ኣብ ቀዳማይ ምዕራፍ ናይ ኦሪት ዘፍጥረት፡ <<ኣምላኽ ብመጀመርታ ሰማይን ምድርን ፈጠረ>> ይብል። ነዚ ቃል ብቀጥታ ኣንቢብና ክንርድኦ ንኽእል። ምኽንያቱ ትርኻዊ መልክዕ ስለዘለዎ።

2.    ምሳሌያዊ ትርጉም፡ ንኣብነት፡ ዘልኣለማዊ ድንግልና ናይ ኣዴና ቅድስቲ ቅዱሳን ድንግል ማርያም፡ <<ኣቲ ሓብተይ መርዓተየ እጽውት ገነት ዕጽኢ ዔላ ሕቱም ዐይኒ ማይ ኢኺ>> (መሃ 4፡12)፡ ነዚ ሓይለ ቃል ብነጸላ ትርጉም ክንወስዶ እንተ በልና ክንርድኦ ኣይንኽእልን ኢና። ምኽንያቱ

ዓይኒ ማይ = ከመይ ገይራ ትሕተም፤

ዒላ = ከመይ ገይራ ትዕጾ

ኣዒንትኹም ናብ ላዕሊ ቋሕ ኣቢልኩም ርኣዩ:: ኢሳ 40፡26

 በስመ አብ ወወልድ ወመንፈስ ቅዱስ አሃዱ አምላክ አሜን!!!

<<ኣዒንትኹም ናብ ላዕሊ ቋሕ ኣቢልኩም ርኣዩ>> ኢሳ 40፡26

(Click Here to Read PDF)ነዚ ብክልተ ዝኣፉ በሊሕ ዝኾነ ቃል እግዚኣብሔር ንምዝራብ፡ ዓቕሚ ሃሊዩኒ ዘይኮነስ ገላጽነት መንፈስ ቅዱስ ብምእማን፡ ክእለት ዘረባ ሃልዩኒ ዘይኮነስ ምሕረቱ ብምእማንን፡ መራሒ ሓጢኣተኛታትን ምዃነይ ፈሊጠ፡ ነገር ግን ነእማን ቢታንያ ከምኡ’ውን ንኣድጊ በልዓም ዘዛረበ፡ ናይ ሰማይን ምድርን ንጉስ ኤልሻዳይ ምዃኑ ኣሚነ፡ ብሃበተ ምሕረቱ ክቕበሊ ተዛራቢ ጥራይ ዘይኮነ ንትእዛዛቱ ተግባሪ ንምዃን ከብቅዐኒ ንቅዱስ ኣምላኸይ ይምሕጸኖ።

ንሎሚ ከም ፍቓድ እግዚኣብሔር እንዘራረበሉ ካብ ኣበይት ነብያት ነቢይ ኢሳይያስ ዝተዛረቦ ቅዱስ ቃል መሰረት ብምግባር ክንዘራረብ እና። እቲ ቅዱስ ቃል ከምዚ ይብል፡ <<ኣዒንትኹም ናብ ላዕሊ ቋሕ ኣቢልኩም ርኣዩ>> ።

ነቢይ ኢሳይያስ ካብ ኣበይቲ ነብያት ዝተባህለሉ ምኽንያት። ነብያት ናይ ቃልን ናይ ጽሑፍን ተባሂሎም ይኽፈሉ።

በስመ አብ ወወልድ ወመንፈስ ቅዱስ አሃዱ አምላክ አሜን!!!

<<ንዑናይ ናብ እግዚኣብሔር ንመለስ>> ሆሴእ 6፡1

(Click to read in PDF)ብክርስቶስ ክርስቲያን ብወልድ ውሉዳን ብመንፈስ ቅዱስ መንፈሳውያን ዝተሰመኹም ህዝበ እግዚኣብሔር ከመይ ቀኒኹም፤ ናይ ኣዴና ቅድስት ቅዱሳን ንጽህተ ንጹሃን ወላዲት ኣምላክ ድንግል ማርያም ናይ ቃል ኪዳን ደቃ፡ ብጸሎት ቅዱሳን እግዚኣብሔር እትምሕጸኑን እትውከሉን ከመይ ኣለኹም። ኣሜን!!!

ስሙ ንዘልኣለሙ ብኣና ብድኹማት ባሮቱ ብኣፍ ኩሎም ፍጡራኑ ዝኸበረን ዝተመስገነን ይኹን።

ንሎሚ ከም ፍቓድ እግዚኣብሔር፡ <<ንዑናይ ናብ እግዚኣብሔር ንመለስ>> ዝብል ሓይለ ቃል ክንምገብ፡ ንቅዱሳኑ ምስጢሩን ጥበቡን ዝገለጸ ንዓና’ውን ምስጢሩን ጥበቡን ምስትውዓሉን ክገልጸልና ቅዱስ ፍቓዱ ይኹነልና።

ኩሉ ተፈቂዱለይ እዩ፡ ግናኸ ኩሉ ኣይጠቅምን እዩ:: 1 ቆሮ 6፡12

በስመ አብ ወወልድ ወመንፈስ ቅዱስ አሃዱ አምላክ አሜን!!!

<<ኩሉ ተፈቂዱለይ እዩ፡ ግናኸ ኩሉ ኣይጠቅምን እዩ>> (1 ቆሮ 6፡12)

(Click to in PDF)ብኣርብዓን ብሰማንያን ውሉድነት ሥላሴ ዝተቀበልኩም ደቂ ቅድስትን ጽንዕትን ዝኾነት ኦርቶዶክሳዊት ተዋህዶ እምነት፡ ናይ ኣዴና ቅድስት ቅዱሳን ድንግል ማርያም ናይ ቃል ኪዳን ደቃ ዝኾንኩም፡ ሰላም እግዚኣብሔር ንዓኹም ይኹን። ከም ፍቓድ እግዚኣብሔር ነዚ ኣብ ላዕሊ ተጠቂሱ ዘሎ ሓይለ ቃል መሰረት ብምግባር፡ ሓዋርያ ቅዱስ ጳውሎስ ናብ ሰብአ ቆሮንጦስ ኣብ 1ይ መልእኽቱ ዝጸሓፎ ሓይለ ቃል ወሲድና፡ ካብኡ በረኸት ካብኡ ድማ ዘልአለማዊ ህይወት ንኽንረክብ ቅዱስ ፍቃድ ናይ እግዚኣብሔር ኣምላኽ ይኹነልና።

ከተማ ቆሮንጦስ ኣብ ግሪኽ እትርከብ ኮይና ካብ ከተማ ኣቴንስ 78 ኪ.ሜ. ርሒቃ ትርከብ። ጐይታናን መድሓኒናን ኢየሱስ ክርስቶስ ካብ ሰማየ ሰማያት ወሪዱ ኣብ ቅድስት ቅዱሳን ኣዴና ድንግል ማርያም ሓዲሩ ንድሕነት ደቂ ሰባት፡ ሰብ ኣብ ዝኾነሉ እዋን፡ ከተማ ቆሮንጦስ 6,000 ተቀማጦ ህዝቢ ነበራ።

ኣገልግሎትን፣ ፍረታት መንፈስ ቅዱስን

በስመ አብ ወወልድ ወመንፈስ ቅዱስ አሃዱ አምላክ አሜን!!!

ኣገልግሎትን፣ ፍረታት መንፈስ ቅዱስን

<<እቲ ፍረ መንፈስ ግና ፍቕሪ፡ ሓጐስ፡ ዕርቂ፡ ዓቕሊ፡ ለውሃት፡ ሕያውነት፡ እምነት፡ ህድኣት፡ ይኣኽለኒ ምባል እዩ።>> (ገላ.5፣22)

(Click Here For PDF)ሓደ እዋን ሰይጣን ንኣባ መቃርስ ጸላእትኻ ኣመና በዚሖም ምስበሎ፡ ኣባ መቃርስ “ንሰብ ጸላኢ ሰብ የብሉን” ኢሉ ንሰይጣን ኣሕፈሮ። ዲያቢሎስውን መሊሱ እሞ ንሰብ ጸላኢኡ መንዩ? ኢሉ ንኣባ መቃርስ ሓተቶ፤ ኣባ መቃርስውን፣ ጸላኢ ሰብ ደኣ ንፍጥረታት ዕለተ ዓርቢ ዝኾነ ሰብ ኣዳም ዝፈተነ፡ ንእዮብ፡ ንዳዊት ነቶም ዝበቅዑ ኣቦታት ዝፈተነ ሓደ ፍጥረት ኔሩ ንሱ ኢዩ ጸላኢኡ!” ንስኻ ነዚ ፍጥረት ኣይትፈልጦን ዲኻ?”ኢልዎ። ዲያቢሎስ ከኣ ብፍጹም ሰሚዐሉ’ውን ኣይፈልጥን፡ ዋላ ሓደ ዝፈልጦ የብለይን። ዝገርም’ዩ ከመይ ዝበለ ጨካን ፍጥረትዩ በለ ርእሱ እናነቕነቐ። እወ ከምዝበልካዮ ጨካን’ዩ። ነዚ ፍጥረት ዘይምፍላጥካ ግን ገሪሙኒ፡ ይገርመካ ንሱ ጨካን ጥራይ ኣይኮነን ነቲ ዝፈጠሮ ኣብ ገዳመ ቆሮንጦስ ዝፈተነ ደፋርውን እዩ። ጨካንን ደፋርን ዋላ እንተኾነ ግን ብጐይታና ተሳዒሩ እዩ’ሞ ንሕና’ውን ነዛ ጾም ለንቅነ ንጾሟ እኮ ኢና ዘለና፡ ኢልዎ። ኣብዚ እዋን ዲያቢሎስ ተሳዒሩ ዝብል ቃል ክሰምዕ ከሎ ስዕረቱ ተዘኪርዎ ኣዕለበጠ። ከይፍለጥ ግና “ኣይ እዚ ደፋር! ጉድ እናበለ ምምሳሉ ቀጸለ፡ ኣባ መቃርስ ከኣ እሞ ንስኻ ነዚ እንተዘይፈሊጥካዮ ኣይትጸውምን ኢኻ ማለት’ዩ? ኢልዎ ፍሽክ እናበለ፣

ቲ'ዚጉዳእ መን እዩ።

በስመ አብ ወወልድ ወመንፈስ ቅዱስ አሃዱ አምላክ አሜን።

ቲ'ዚጉዳእ መን እዩ።

(Click For PDF)ጐይታና መድኃኒና ኢየሱስ ክርስቶስ ኣብ ናይ እምባ ስብከቱ ካብ ዘምኃሮም ትምህርቲ ሓደ << ንጸላእትኹም ፍተዉ ዝረግምኹም መርቑ ……  ንዚጸልእኹም ጽቡቕ ግበሩ ስለቶም ዚጸፍርኹም ዚሰጉኹምን ጸልዩ። >> ዝብል ይረከቦ። ማቴ.5፣43-44፣ ብዙኃት ነዚ ቃል ዋላ እንተፈለጥናዮ ጸላእትና ክንፈቱን፣ ክንምርቖምን ብዛዕብኦም ንጽልየሉ ምኽንያት እንታይ ከምዝኾነ ብዘይምስትውዓልና ነዚ ነገር እዚ ክንገብሮ ንጽገም። << ጐይታና መድኃኒና ኢየሱስ ክርስቶስ ከምዚ ክንገብር ስለዘምኃረና እዩ። >> ብምባል ከም ትእዛዝን ግዴታን ጥራሕ ጌርና ንምልከቶምውን ኣይንጠፍእን ኢና።

ብቃልኪዳነይ ጸኒዐ ክጽበ እየ።

በስመ አብ ወወልድ ወመንፈስ ቅዱስ አሃዱ አምላክ አሜን!

ብቃልኪዳነይ ጸኒዐ ክጽበ እየ።

ዝኸበርኩም ኣኃዋትን አኃትን ኣብዚ ሰሙን ካብ ዘንበብኩዎ ከካፍለኩም ሠናይ ንባብ።

(Click For PDF) 

ሓደ ሰብኣይ ንንግዲ ካብ ዓዱ ናብ ካልእ ዓዲ ኪኸይድ ይሓስብ እሞ። ንበዓልቲ ቤቱ በዚ ነገር የማኽራ፣ ኮፍ ኢሎም ድማ ይመኽሩ ከምዚ ድማ ይብላ። ክብርቲ በዓልቲ ቤተይ ሓደ ሓሳብ ከማኽረኪ፣ ኣነ ንንግዲ ናብ ካልእ ዓዲ ንነዊሐ መገሻ ኪኸይድ እሞ ነጊደ ጺዒረ ላዕልን ታሕትን ኢለ መኽሰበይ ሒዘ ክምለሰኪ። ግና ንኽንደይ እዋን ማለት መዓስ ጊዜ  ከምዝምልስ ኣይፈልጥን እየ ክንደይ ዓመት ከምዝጸንሕ'ውን ሕጂ ክውስኖ ኣይክእልን እየ።  ስጋብ ዝምለስኪ ግና ዝኣክል ገንዘብ ኪገድፈልኪ እየ ። ንሳ ከኣ ብውሽጣ ምፍላዩ ዋላ ደስ እንተዘይበላ ግና ካብቲ ዝኸዶ መገሻ ከይትዕንቅፎ ብምስምማዕ ሕራይ በለቶ።

እቲ ሰብኣይ ብመንፈሳዊ ዝበርትዐ ስለዘይነበረ እንዳተወላወለ ቀጺሉ ከምዚ በላ << ዘሸግረኪ ፈተና እንተሎ ናይ ሓሳብ ሥጋ  እዩ። እሱ ከኣ ኣባኺ ገዲፈዮ ኣለኹ።>> ብምባል ዋላ ምኽሪ ከይለገሰላ ብንብዓት ተሰናቢታቶ ተፈላለዩ።

በስመ አብ ወወልድ ወመንፈስ ቅዱስ አሃዱ አምላክ አሜን!

<<ኣባኻ ተዋሐሰኒ፡ እንተ ዘይኰነስ መን እዩ ኣገና ዚጠቕዓለይ>> (እዮብ 17፡3)

(Click For PDF)

ሰላም እግዚኣብሔር ንዓኹም ይኹን ክርስቶሳውያን። ሰማይን ምድርን ዝፈጠረ ልዑል እግዚኣብሔር ይኽበር ይመስገን ከም ትብሉኒ እምንቶይ እዩ። በረኸቱን ጸግኡን ይብዝሓልኩም ብምባል ድማ ናብ ትሕዝቶይ ክሓልፍ። ካብ ንፍጠር ኣትሒዝና ትርጉም ፍቓድ እግዚኣብሔር ምድላይ ወይ ነገርና ኣብ ኢድ እግዚኣብሔር ምምዕቛብ ዝጠፍኣና ይመስል። ንኣብነት እዞም ፈላጣት ኢና ንብል ብኣካዳማያዊ ዓቕሚ ክብ ዝበልና፡ ይቕረ ግበሩለይ ደኣ እምበር ሕልፍ ዝበለና ኢና። በዘን ዘይጠቕማ ትምህርቲ፡ ብልሒ ወይ ንዋታዊ ሓይሊ ፍሉይ ነገር ንገብር ወይ ብቕኑዕ ኣበሃህላ ንዓለም ከም ድልየትና ክንጠዋውያ ንኽእል እዩ ዝመስለና። እዚ ከኣ ነገርና ንእግዚኣብሔር ንምሃብ ይዕንቅጸና። ነገርና ንእግዚኣብሔር ምሃብ ክበሃል ከሎ ብዙሕ ሰማያዊ ጸጋታት ይሓቑፍ። ንኣብነት ካብ ብዙሕ ውሑድ፡ ትሕትና፡ እምነት፡ ፍቕሪ፡ ረድኤት ኣምላኽ ምጽባይ. . . ወዘተ እዮም።

ንኣብነት ሓደ ሰብ፡ “ዓለም ሎሚ ቀላጽመይ ከርእየኪ እየ” ብዘስምዕ ሓሳባት፡ ብልሑ ተጠቂሙ፡ ከውርድ ከደይብ፡ መደባት ክሕንጽጽ፡ ኮታ ብዙሕ ሃልኪ ይሃልኽ። ዝኾነ በቲ ዝሓንጸጾ ምስ ዘይከይድ ድማ ይሓርቕ። እዚ ምንጽርጻር ኸኣ ዓለም ከምቲ ንሱ ዝደልዮ ስለዘይከደት እዩ። ኣብዚ እዋን’ዚ እዩ ነቲ ጠዋይ ንምቕናዕ፡ ትውክልቱ ናብ እግዚኣብሔር ንምግባር ብፈተና ዝኸውን። ኣብዚ እዩ ኩሉ ሰብ በቃ! ኩሉ ነገረይ ኣብ ኢድካ ኣረኪበካ ኣለኹ፡ ድላይካ ግበረኒ ዝብል። ኣብ መወዳእታ፡ እታ ካብ ቀደም ክትበሃል ዝነበራ ቃል፡ ኦ እግዚኣብሔር ፍቓድካ ይኹን! ክብል ይጅምር። እዚ ከኣ ብመከራ ከመይ ገይርና ኩሉ ነገርና ትሕቲ ኢድ እግዚኣብሔር ነማዕቑብ ዝብል ኣምር ነሕድር።

“ንድሕሪት ክምለስሲ ግዲ ኣይትበልኒ” (ሩት 1፡16)

በስመ አብ ወወልድ ወመንፈስ ቅዱስ አሃዱ አምላክ አሜን!!!

ክርስቶስ ተንሥአ እሙታን -- ብዓቢ ኃይል ወሥልጣን

 አሰሮ ለሰይጣን -- አግኣዞ ለአዳም

ሰላም -- እምዘእሴ

ኰነ -- ፍስኃ ወሰላም።

ኣሜን!  ፍስሃ ኮይኑ፡ ሰላም’ውን ንኹሉ ህዝበ ክርስቲያን ኮነ።

ብሓቂ ነፍሱ ኣዋሪዱ ንዓና ኣኽቢሩና። ኣምላኽ ኣማልኽቲ ንጉሠ ነገሥታት ጐይታ ጐይቶት ኣልፋን ኦሜጋን ኣምላኽና መድኃኒና ኢየሱስ ክርስቶስ ክብሪ ይኹኖ።

ምኽሪ ለባማት

+ በስመ ኣብ ወወልድ ወመንፈስ ቅዱስ ኣሃዱ ኣምላክ ኣሜን!!!

ክልተ ኣሕዋት ሃብታማት ዝነበሩ እዋን ኣርኪቡዎም ሃብቶም ኣብቂዑ ድኽነት ኣርኪባቶም ካብቲ ዝነበሩዎ ከተማ ክስደዱ ተገደዱ። እቲ ሓደ ኣብ ለባም ሰብ ተዓስበ እቲ ካልኣይ ከኣ ኣብ ደሓን ዝኾነ ሃብታም ተዓስበ።

ድሕሪ ነዊሕ እዋን ናብ ዓዶም ክምለሱ ምስ ሓሰቡ፡ እቲ ምስ ለባም ዝነበረ “ክንድዚ ዚኣክል ዓመታት ምሳኻ ሰሪሐ ሕጂ ግና ናብ ቤተ ሰበይን ዓደይን ክኸይድ እንታይ ትመኽረኒ፤” በሎ። እቲ ለባም ሰብኣይ ከኣ ምስትውዓሉ ርእዩ ከምዚ ኢሉ መለሰሉ። “ነቲ ዝህበካ ምኽሪ ካብቲ ሒዝካዮ ትኸይድ ገንዘብ ክውሕደካ እዩ” ይብሎ። እቲ መንእሰይ ከኣ “ኣይፋልካን ደኣ ምኽርኻ ካብ ገንዘብ ንላዕሊ እዩ” ኢሉዎ። እቲ ለባም ሰብኣይ ከኣ “በል ሓንቲ ምኽሪ ብ500 ዲናር እየ ክህበካ” በሎ። እቲ መንእሰይ ከኣ 2000 ዲናር ጥራይ ነበሮ። ሕራይ ኢሉ ከኣ በቲ ዝበሎ ተሰማሚዑ።

1. ብትፈልጦ መንገዲ እምበር ብዘይትፈልጦ መንገዲ ኣይትኺድ። ወስኸኒ ደኣ ይብሎ እቲ መንእሰይ።
2. ዘምጽኣካ ደኣ እምበር ዘይምጽኣካ ኣይትግበር። “ኣይዓገብኩን ምኽርኻ መግበኒ ደኣ። ምኽንያቱ ገንዘብ ኣብ ቅድሚ ምኽርኻ ዋጋ የብሉን” ይብሎ።
3. ንእትወስዶ ውሳኔ 3 ጊዜ ሓሲብካ ፈጽሞ። ይብሎ።

እቲ መንእሰይ ወላ’ታ ተሪፋቶ ዝነበረት 500 ዲናር ኣይበቀቃን። ኣብ መንገዲ እንታይ ይጸንሓኒ ኢሉ  ኣይሓሰበን። ነዛ ተሪፋ ዘላ ክህበካ መዋእለይ ዘይጣዓሰሉ ምኽሪ ሃበኒ አሉ ለመኖ

 4. ነዛ መወዳእታ ምኸረይ ኣብ ወረቀት ጽሒፈ ክህበካ እየ። ዓድኻ ምስ በጻሕካ ክፈታ ይብሎ።

እዚ ለባም መንእሰይ ምስ ለባም ሰብ ስለ ዝነበረ ምኽሪ ሒዙ ናብ ዓዱ ይብገስ። እቲ ምስ ሃብታም ዝነበረ ከኣ ገንዘብ ጥራይ ሒዙ ይብገስ። ነቲ ዓርኩ ዝገበሮ ምስ ፈለጠ ከኣ ኣባጨወሉ።

መንገዶም ከይተበገሱ ከለው፡ ሕጽር ዝበለ በቅልጡፍ ናብ ዓድና እንበጽሓሉ መንገዲ ዘይነናዲ ይበሃሃሉ። ኣብዚ ህሞት እዚ ምኽሪ ለባም ዝሰነቀ “ኖኖእ ኣነ በታ ዝፈልጣ መንገዲ እየ ዝኸየድ” ይብሎ። በዚ መሰረት ከኣ ተፈላሉዩ። እቲ ብኣቋራጭ መንገዲ ዝኸደ መንእሰይ ኣራዊት ረኺቦም ይበልዕዎ። እቲ ምኽሪ ለባም ዝሰምዐ እሞ ዘተግበረ ገለ ከይተጐድአ ጎዕዝኡ ቀጸለ። ኣብ ሓንቲ ከተማ ምስ በጽሐ መሬት መስዩ ከሕድሮ ዝኽእል ሰብ አናድዩ፡ ከሕድረካ እየ አሉ ሓደ ሰብ ናብ ቤቱ ምስ ወሰዶ፡ ኣብዚ ጽንሓኒ መግብን መደቀስን ከምጽኣልካ እየ ኢሉዎ ይኸይድ። ኣብቲ ዝንበሮ ቦታ ሬሳታት ምስ ጸንሖ ሰንቢዱ ሕማቕ ሓሰበ። እዚ ሰብኣይ ደኣ ቀታሊ ሰብ እዩ ኢሉ ሓሰበ። ንዓይ ከኣ ከይቀተለኒ ከሎ ክቀትሎ ኢሉ ካራ ኣዋደደ። ሕስብ እንተበለ ግና ምኽሪ ለባም አስራሒኡ ዘኪሩ “ዘምጽኣካ እምበር ዘይምጽኣካ ኣይትግር” ዝብል ምኽሪ ኣብ ሓሳቡ መጾ። እዚ ሰብኣይ ንዓይ ጽቡቕ ክገብረለይ ኢሉ ኣብዚ ኣምጺኡኒ፡ ኣነ ኸኣ ከዕርፍ መጽየ እምበር እንታይ እዩ ዝገብር ኣይፈልጥን እየ። ስለዚ ሱቕ ምባል ይሕሸኒ ኩሉ ንኣምላኽ ሓዲገዮ ኣለኹ ኢሉ ብዓቕሊ ተጸቢዩዎ። እቲ ሰብኣይ መጽዩ ነቲ ዝግባእ ናይ እንግዶት መግቡ ሂቡ መደቀሲ ኣዳለወሉ። ከይተዛረበ መሬት ምስ ወገሐት ናብ ዓዱ ተበገሰ። ይቀንየለይ ዝገበርኩምለይ ከኣ ኣምላኽ ዓስብኹም ይኽፈልኩም ኢሉዎ። እቲ ሰብኣይ ከኣ በል ዝሓወይ ንስኻ ጥዑይ ሰብ ኢኻ እዞም ዝራእኻዮም ሬሳታት ዘምጽኦም ገዲፎም ዘይምጽኦም ስለዝተዛረቡኒ ማለት “ሰብይትኻ ደኣ ኣበይ ኣላ፤ ወይ እንታይ ትገብር ኣብዚ ስፍራ እዚ እና በሉ ስለዘጽበቡለይ እየ ሓሪደዮም። ንስኻ ግና ዘምጽኣካ ጥራይ ስለዝገበርካ ኣምላኽ መንገድኻ የቅንዓልካ” ኢሉ መሪቁ ኣፋነዎ። በቲ ዝገበሮ ከኣ ደስ እና በሎ ጉዕዝኡ ቀጸለ።

ዓዱ በጺሑ ቅድሚ ናብ ቤት ኣብኡ ምእታዉ፡ ስድርኡ ምርካቡ፡ ነዚ ኹሉ ዝገበረለይ፡ ብጥዕና፡ ብሰላም ዝመለሰኒ እግዚኣብሔር ኣምላኸይ ከመስግኖ ናብ ቤተ ክርስቲያን ክኸይድ። ኣብ መንገዲ ፍቑራት እናተሰዓዓሙ ናብ ቤተ ክርሰቲያን ዝኸዱ ይርኢ እሞ ይናደድ። ጽቡቕ ስለዘይገብሩ ዘለዉ ናብኦም ከይደ ክሃርሞም ኢሉ ይሓስብ፡ ግና ምኽሪ ለባም’ውን ይገትኦ። እቲ እትወስዶ ስጉምቲ 3 ግዜ ሓሲብካ ፈጽሞ ዝብል ኣብ ኣእምሮኡ ይመጾ እሞ ይሃድእ። ናብኦም ቅርብ ኢሉ እንተራኣየ፡ እቶም ፍቑራት ኮይኖም ዝተራእዩዎ፡ ኣዲኡ ሓሚማ ሓዉ ደጊፉዋ ናብ ቤተ ክርስቲያን ዝኸዱ ዝነበሩ ኮይኖም ጸንሑዎ። ነቲ ዝሓሰቦ ገሪሙዎ ንስድራቤቱ ስዑሙ ናብ ቤት እግዚኣብሔር ድርብን ዕጽፍን ገይሩ ንኣምላኹ ከመስግኖ ተተሓሒዞም ኣተው። ኣመስጊኑ ምስ እና ተመልሰ ከሎ ነታ ደብዳቤ ናይ’ቲ ለባም ኣስራሒኡ ክፍት ምስ ኣበላ ከምዚ ዝስዕብ ጸንሖ። “እተን ዝነገርኩኻ ምኽሪ ብጥንቃቀ ፈጽመን” ዝብል ቃል ጸነሖ። ምስታ ጽሕፍቲ ከኣ እተን 2000 ዲናር ናቱ ተጠቕሊለን ጸንሐኦ። ደስ እና በሎ ምስ ስድርኡ ብሓጐስ ንቤቱ ተመሊሱ።

እዛ ሓጻር ግና ቁምነገር ሓዘል ዝኾነት ዛንታ ንመሃሮ ብዙሕ እዩ። ገለ ካብኡ፡-

መጀመርያ ከምቲ ቅዱስ ቃሉ “ኣብ ቀራና ጐደናታት ደው ኢልኩም ተመልከቱ፡ እቲ ጥንታዊ መገድታትን እቲ ጽቡቕ ጐደናን ኣየናይ ምዃኑ ሕተቱ እሞ ብእኡ ተመላለሱ ሽዑ ንነፍስኹም ዕረፍቲ ከትረኽቡ ኢኹም” (ትንቢት ኤርምያስ 6፡16) ዝበሎ እታ እንኮ ጥንታዊት ጐደናና በቶም ሕሩያን እግዚኣብሔር ዝኾኑ ቅዱሳን ኣቦታት ሓዋርያት ዝተሰጋገረትልና ኣማናዊት ኦርቶዶክሳዊት ተዋህዶ እምነትና ጸኒዕና ክነብር እዩ። “ወይለኺ ኰራዚን፡ ወይለኺ ቤተ-ሳይዳ” (ሉቃ 10፡13) ከምዝበለ ወይልኹም ደቂ ተዋህዶ። ሎሚ ብመንፈስ ምጥርጣር ተመሊእና፡ ካብቶም ኣቦታትና ንሕና ንፈልጥ፡ ኣቋራጭ መንገዲ ናብ እግዚኣብሔር ረኺብና ኢና እሞ፡ ዘማልደልና ኢየሱስ (ሎቱ ስብሐት) እዩ፡ እናበልካ መፈጸምታና እቲ ቃል “ርኽሰቱ ዘይተሓጽበ ኣነ ንጹህ እየ ዝብል ወለዶ ኣሎ” (ምሳሌ 30፡12) ከይንኸውን ኣመና ምጥንቃቕ የድልየና። እታ ዝተዋህበትና መንገዲ ብትዕቢት ተዋጢርካ ምኻድ ዘይኮነ “ንሕና ዘይንጠቅም ባሮት ኢና እቲ ኽንገብሮ ዚግብኣና ኢና ዝገበርና” (ሉቃ 17፡10) ንበል። ህይወትና ክኸውን ኣለዎ እዚ ቃል እዚ። ብሓቂ ከምቲ ዘማራይ ዳዊት “ቃልካ ንእግረይ መንራህቲ ንመንገደይ ብርሃን እዩ” (መዝ 119፡105) ዝበሎ ቃሉ ተመጊብና ፍቓዱ መሊእና ክነብር ናይ ኣምላኽና ቅዱስ ፍቓዱ ይኹነልና። ምኽንያት ናይ ምፍጣርና እንተተረዲእና ኮይና ከኣ ኣብዛ ምድሪ ዓስቢ ሰማይት ክንረክብ ደኣ ተድላ ሥጋና ክንመልእ ስለዘይኮነ ተጊህና ክብሪ ዉሉድነት ዘውርሥ ስራሕ ክንሰርሕ እዩ ግቡእና። ኣብ መወዳእታ ከኣ ከምቲ ቀዳሞት ኣዳምን ሔዋንን ጸላኢ ሰናያት ኩሉ ግዜ ኣብ መንጐናን መንጐ እግዚኣብሔርን ኣሎ። ምስ እግዚኣብሔር ጽቡቕ ርክብ ክህልወና ስለዘይፈቱ ክንፍተን ኢና፡ ክንወድቕ ኢና፡ ግና ክንትንስእ ኣሎና። ምኽንያቱ እቲ ንቡር ምውዳቕና እንተኾይኑ ዘይንቡር ግና ዘይምትንሳእና እዩ። ድኻም ክስመዓና የብሉን። ምኽንያቱ ተስፋ ሰማያት ስለዘለና። እዚ ኸኣ “ንምስትውዓል እምንቲ ፈታዊተይ ኢኺ በላ” (ምሳ 7፡4) ከም ዝበለ ኣስተውዒልና ሓሲብና ተጠንቂቕና ምጉዓዝ የድልየና።

ኣብ መደምደምታ ግና ኣብ ክሳድና ንኣስሮ ማዕተብ ከም ሕላገት ካብ ኩሉ ክፉእ ዝሕልወና እዩ። ስለዚ “ወደየ፡ ንቓላተይ ዘክሮ፡ ንትእዛዛተይ’ውን ከቶ ኣይትረስዓዮ። ንትእዛዛተይ ሓልዎ እሞ ብሕይወት ክትነብር ኢኻ፡ ንሕገይውን ከም መርዓት ዓይንኻ ሓልዎ። ኩሉ ሳዕ ምሳኻ ሓዞ፡ ኣብ ሰሌዳ ልብኻውን ጽሓፎ” (ምሳ 7፡1-3) ። ይብል እቲ ቅዱስ ቃል እሞ ኣብ ልብና ሰፊሩ ቅዱስ ቓሉ ኣብ ክንዲ ሓደ 30፡ 60፡ 100 ኻዕበት ንኽንፈሪ ናይ እግዚኣብሔር ቅዱስ ፍቓድ ይኹነልና። ጀመርቲ ጥራይ ዘይኮናስ ካብቶም ፈጸምቲ ይግበረና። ፍቕሪ ኣምላኽን ጸጋ ጐይታናን ሕብረት መንፈስ ቅዱስን ምስ ኩላትና ይኹን። 

(For those who do not have Geez, please check on this link) MIKRI LEBAMAT

ወስብሐት ለ እግዚኣብሔር

ወለወላዲቱ ድንግል

ወለመስቀሉ ክቡር

ኣሜን!!!        

ተስፋ

በስመ ኣብ ወወልድ ወመንፈስ ቅዱስ ኣሓዱ ኣምላክ ኣሜን!!!

ተስፋ ካብ መዓሙቕ ጸልማት በሪ ብርሃን ከፊታ ንነፍስ ሰንከልከል ከይትብል ትሕልዋ። ተስፋ ጭንቀት ዘድረቓ ነፍሲ፡ ፈልፋሊ ማይ ህይወት ትኾና። ተስፋ ስራሕ መንፈስ ቅዱስ እያ፡ እቲ ጐይታ ዘተስፈወና መጸናነዒ መንፈስ። ብተስፋ ዝኣምን ካልእ ክጥምቶ ዘይክእል ይርኢ። ምስ ክርስቶስ ዝኾነ ይኹን ተስፋ ኣይቆርጽን እዩ። ምስ ድንቂ ዝኾነ ሰራሕ ኣምላኽ ከመይ ገይሩ ተስፋ ክቖርጽ፤ ኣምላኽ ንኹሉ ብዝመደቦን ብዝፈቐዶን እዩ ዝኾውን ዘሎን ዝነበረን ብድሕሪ ሕጅን ዝፍጸምን። ብዘይናቱ ፍቓድ ዝኾነት ትኹን ኣይትትግበርን። ንዝተዋረዱ ልዕል ዘብል ጐይታ ጐይቶት እዩ። ንሕና ምስሉን መልክዑን’ዶ ኣይኮናን፤ ስለዘፍቐረና ከኣ ድርዒ ዋልታና እዩ። ተስፋ ኣይንቆርጽን፡ ኣብ ቃል ክርስቶስ ተስፋና እናዛየደ ይኸይድ። ከመይ፤ እዚ ቃል ስለዝምግበና፡ “ስለ ምግፋዕ ጥቑዓትን ስለ ልቕሶ መሳኪንን ሕጂ ኽትንስእ፡ ነቲ ዚናፍቖውን ምድሓን ከምጽኣሉ እየ፡ ይብል እግዚኣብሔር” (መዝ 12፡5) ። እግዚኣብሔር ኣብ ዝትንስኣሉ ግዜ ኣብ ቅድሚኡ ደው ክብል ዝኽእል የለን። ክድንጒ ይኽእል ግዜ ክወስድ ይኽእል ግና ብዘይጥርጥር ኣብ መወዳእትኡ ክመጽእ እዩ። ዕራርቦ ጸሓይውን እንተኾነ ክመጽእ እዩ።

ተስፋ ዘለዎ ሰብ መንፈሱ ርጉእ እዩ። ከምቲ ዘማራይ ዳዊት ዝበሎ “ኪቃወመኒ ኢሉ እኳ ሰራዊት እንተ ዚሰፍር ልበይ ኣይፈርህን እዩ፡ ኲናትውን እንተ ዚለዐለኒ እምነት ኣሎኒ” (መዝ 27፡3) ። ፍጹም ዘይነቓነቕ፡ ከውሒ ዝኾነ እምነት። ዝሓዝኩዎ መን ድዩ፤ እግዚኣብሔር እዚ እዩ ቃላቱ ንዓይ ዝሃበኒ፡ “ንሱ ባዕሉ ኣይክሐድካን ዕሽሽውን ከቶ ኣይክብለካን እየ ኢሉ።” (ዕብ 13፡5) ቀጺሉውን “እግዚኣብሔር ኣምላኽካ ንሱ እዩ ምሳኻ ዚኸይድ እሞ ኣይጠልመካን ኣይሓድገካን እዩ” (ዘዳ 31፡6) ። ተስፋስ ኣሎኒ ቆጸራኡ ድማ ቀረባ እዩ። “ኣነ ምሳኻ እየ፡ እቲ ዝበልኩኻ ኽሳዕ ዝገብሮ ኣይሐድገካን እየ እሞ ኣብ እትኸዶ ኹሉ ኽሕልወካ እየ” (ዘፍ 28፡15) ። ሰበይቲ ‘ኳ ንፍረ ኸርሳ እንተረሰዐት “ምንም እኳ ንሳተን እንተ ረስዓ ኣነስ ኣይክርስዓክን እየ” (ኢሳ 49፡15) ። እዚ ዝመሰል ህይወት ተዋሂቡኒ ደኣ እምበር መዓስ ጽዒረሉ፤ ኩሉ ብሰናይ ፍቓዱ እምበር ኣበይ’ከ ኢለዮ። ምስጋና ንልኡል ኣምላኽና ይኹን። “ኹለን ጸጒሪ ርእስኹም እኳ ቑጹራት እየን” (ሉቃ 12፡7) ኢሉኒ ኸሎስ ንምንታይ ደኣ ዝጨነቕ፤ ዝኾነ እንተ ኾነ ዝመጸ እንተ መጸ ኣምላኽ ኣሎ፡ ኣምላኽ ይርኢ ኣሎ ይብል እቲ ንኣምላኽ ዝጽበ። ኩሉ ኣብ ቅድመይ ግብ ዝበለ ጸላማት ወላኳ እንተኾነ ኩሉ ክሓልፍ ኢለ ልበይ ዘይየርግእ። ንኹሉ መወዳእታ ስለዘለዎ እዚ ሽግር’ዚ ከሓልፍ እዩ።

ደቂ እግዚኣብሔር ቀጻሊ ኣብ ተስፋ ይነብሩ። ተስፋ ንዘይብሉ ነገር እንተ ኣጓነፎም ብትዕግስቲ ይጽበዩዎ። ኖ ኖ ኖ ኢሉ ይጅምረልካ እቲ ኣብ ኣምላኽ ዝተወከለ ሰብ፡ ኣምላኽ ደኣ እኮ ስርሑ እዩ ዝሰርሕ ዘሎ። ኣምላኽ በቲ ንሱ ዝፈልጦ መንገዲ እዩ ዝሰርሕ። በቲ ንሕና ንግምቶ ኣይኮነን። ኣብ መወዳእትኡ ጥበብ ኣምላኽ ከመይ ከም ዝኾነ ክትርኢ ኢኻ ይብለካ። ሕጉስ ከኣ ትረኽቦ።

ተስፋ ዘለዎም ኣብ ሓጐስ ይነብሩ። መጽሓፍ ቅዱስ እንታይ ይብል “እንሆ ነቶም እተዐገሱ ብጹኣን እዮም” (ያዕ 5፡11) ። ኩልና ብተስፋ ሕጉሳት ንኹን!!!

ገለ ሰብ ይኣኽለኒ ሕጅስ ሙሟት ይሕሸኒ፡ አገልግሎተይ ጠጠው ከብል፡ ኢደይ ንሓጥያት ክህብ፡ እንታይ እሞ ክጠቕመኒ፡ ሃሊኸ፡ ጠፊአ፡ ኩሉ ዝነበረኒ ኣጥፊአዮ እየ ኢናበለ ዘምርር ሰብ ተስፋ ዝቆረጸ እዩ። ብኣንጻሩ ከኣ “እቶም ንእግዚኣብሔር ዚጽበዩ ግና ሓይሎም ይሕደስ። ከም ንስሪ በኽናፍ ይድይቡ፡ ይጐዩ እሞ ኣይሕለሉን፡ ይኸዱ እሞ ኣይደኽሙን” (ኢሳ 40፡31) ።

 ንዓና ዝተዋህበና ውህብቶ አኮ ፉሉይ እዩ። ፍጹም ኣይድርብየካን ሸለል’ውን ኣይብለካን እየ ካብ በለና ተስፋ ኣይንቆርጽን ኢና። ኢድና ኣይንህብን። ደቂ ኣምላኽ ኣይደኽሙን፡ ዋላ’ኳ እቲ ደጋዊ ስጋና እንተ ፈረሰ ውሽጣዊ ሓይልና መዓልታዊ ይሕደስ። ኣብ ደቂ ሰባት ዘይከኣል ኣብ ኣምላኽ ይከኣል እዩ፡ ብዘይጥርጥር ይኸውን ድማ።

 ምንጪ፡ ስብከት ካብ ዓረበኛ ልሳን ፖፕ ሺኖዳ 3ይ (H.H. Pope Shenouda III) ጸሎቱን በረኸቱን ምስ ኩልና ይኹን ።

(For those who do not have Geez, please try this link) HOPE

ወስብሓት ለእግዚኣብሔር

ወለወላዲቱ ድንግል

ወለመስቀሉ ክቡር

ኣሜን!!!

ጸሎት

በስመ ኣብ ወወልድ ወመንፈስ ቅዱስ ኣሓዱ ኣምላክ ኣሜን!!!

   “ኣዒንቲ እግዚኣብሔርሲ ናብ ጻድቃን እየን ዚርእያ፡ ኣእዛኑውን ናብ ጸሎቶም እየን፡ ገጽ እግዚኣብሔር ግና ነቶም ገበርቲ እከይ ይጻረሮም እዩ” (1 ጴጥ 3፡12) ።

ጸሎት፡ ትርጉሙ ምስ ኣልፋን ኦሜጋን ዘራኽበና መሳልል እዩ። ምስ ኣምላኽና ዘራኽበና ካብ ኮነ እንጽልዮ ጸሎት ከመይ እዩ፤ ኣብ ዝተሸገርናሉ ጥራይ ዲና ንጽሊ ወይስ ምስ ረሃወና፤ ነቶም ዝሕልዉና መላእክት ‘ከ እንታይ ንምግቦም ኣለና፤

  ንኣብነት ዛንታ ናይ ሓንቲ መንእሰይ ንርአ። እዛ መንእሰይ’ዚአ ኩሉ ጌዜ ከይቋረጸት ትጽሊ ነበረት፡ ሓደ ኣጋጣሚ ምስ ኣጓነፋ ግና ጸሎት ኣቋርጸት። ጸሎታ ዘቋረጸትሉ ምኽንያት ንኣደ ወላዲታ ዝነበራ ዕዙዝ ፍቕሪ ብሰንኪ ሕማም ንምንታይ ኣምላኽ ንዓባየይ ወሲዱዋ ኢላ ስለዝተቆጠዐት እዩ። በዚ መሰረት ምስ እግዚኣብሔር ዝነበራ ጥቡቅ ዝምድና በተኸቶ። እዛ መንእሰይ ግና ጻድቅ ኢዮብ ዝበሎ ዝዘንገዐት ትመስል “እግዚኣብሔር ሀበ እግዚኣብሔር ድማ ወሰደ” ( ኢዮብ 1፡21) ። ፈጣሪ ኩሉ ዓለም ዝደለዮ የጥፍኦ ንዝደልዮ ኸኣ ብህይወት የንብሮ። ቀጺሉ’ውን ጐይታ ኩሉ ዓለም “ካባኻትኩምከ ተጨኒቑ ኣብ ልዕሊ ቑመቱ ሓንቲ እመት ኪውስኽ ዚኽእል መን ኣሎ፤” (ወ. ማቴዎስ 6፡27) ። ሓደ’ኳ የለን!

  እዚ ገና ኣብ ውሽጣ ከም ቁስሊ ዝኾነ ናይ ኣደ ወላዲታ ከይተረሰዐ ከሎ፡ እታ ትፈትዋ ወላዲታ ብሕማም ምስ ተጠቅዐት እቲ ቅድሚ ሕጂ ዝሰንበዳ ሕልሚ ሞት ናይ ዓባያ ኣብ ገጽ ወላዲታ ክትርእዮ ኣይከኣለትን። ብጀካ ሓደ ኣምላኽ ካልእ ሞዕቕቢ ስለዘየለ ኸኣ ገዲፋቶ ዝነበረት ጸሎት ብስቡር ልቢ “ተጋጊየ ኢየ” ኢላ ናብ ኣምላኽ ተንበርኪኻ ክትጽሊ ጀመረት። መሓሪ ኣምላኽ ስለዝኾነ ከኣ ነታ ትፈትዋ ኣላዲታ ኣሕወየላ።

  “እትልምንዎ ኣይትፈልጡን ኢኹም” (ማቴ 10፡38) ከምዝበለ ብሓቂ ነቲ እንጽልዮ “ብፍቓድካ ደኣ እምበር ከም ፍቓድና ኣይኹነልና” ንበሎ። ነቲ ኣምላኽ ደስ ዘብሎ መንገዲ ብትዕግስቲ ከም ንርኢ ኣይእግመናን እዩ። ምኽንያቱ “ኣምላኽ ምሳና ካብ ኮነኸ መን እዩ ዝቃወመና” (ሮሜ 8፡31) ስለዝብል ቅዱስ ቃሉ። ማንም የለን ብሓቂ! ንሕና ዝደለናዮ ጥራይ ዘይኮነ ንሱ ዝፈቐዶ እዩ እቲ ኣገዳሲ ነጥቢ።

  እስራኤላውያን መንገዲ 4 መዓልቲ 40 ዓመት ብሰንኪ ትሪ ልቦም ተጓዘዎ። ንሕና ድማ ካብ ትሪ ልቢ ነጻ ኮይና ምስ እግዚኣብሔር ኣምላኽና ዘለና ርክብር ነደልድሎ። ነዚ ኣምልኪቱ ነቢይ ዳዊት “እራብ ናብ ዓይኒ ማያት ከም እትናፍቕ ከምኡ ኸኣ ነፍሰይ ናባኻ ዎ ኣምላኽ ትናፍቕ ኣላ። (መዝ 42፡1) ኢልና ናብ ልዑል ፈጣሪና እናሻዕ ንቅረቦ። ኣብ ቅዱስ ወንጌሉ ከም ዝበለና “ስለዚ ኻብዚ ዚመጽእ ኩሉ ነገር ንምምላቝን ኣብ ቅድሚ ወዲ ሰብ ደው ንምባልን ሓይሊ ምእንቲ ኽትረኽቡስ፡ ኩሉ ሳዕ እናጸሌኹም ንቕሑ” (ወ. ሉቃስ 21፡36) ። ነዚ ሒዝናዮ ዘለና ሱባኤ ብትጉህ መንፈስ እንጽልዮ ጸሎት የብዛሓልና፡ ንምትግባር ፍቓዱ በቲ ዘይውዳእ ምሕረቱ ይሓልወና ቅዱስ መንፈሱ ጌሩ’ውን ይደግፈና። (PDF) TSELOT

ወስብሐት ለእግዚኣብሔር

ወለወላዲቱ ድንግል

ወለመስቀሉ ክቡር። ኣሜን!!!