ቤተ መቅደስ እግዚአብሔር (4)

በስመ አብ ወወልድ ወመንፈስ ቅዱስ አሃዱ አምላክ አሜን!

<< ስለዚ ወዲ ሰብ ብዘይሓሰብኩምዋ ጊዜ ኺመጽእ እዩ እሞ ንስኻትኩም ድማ እተዳሎኹም ኩኑ።>> ማቴ.24፣44።

ቁጽሪ 5 ደብረዘይቲ መጋቢት ፱/18  (2004) ዓ.ም (2012)

ቤተ መቅደስ እግዚአብሔር ክንኣቱ ከለና ክንገብሮም ዘለና ምድላዋት ካብ ዝሓለፈ ዝቐጸለ

ሐ. መባእ (ህያብ) ሒዝካ ምቅራብ።

  ናብ ቤተ መቅደስ ክንከይድ ከለና ጥራሕ ኢድና ዘይኮና መባእ ሒዝና ክንከይድ ይግበኣና። መባእ ሒዝካ ክንቀርብ ከምዝግበኣና ዝኣዘዘና ሕጊ ዝሰርሓልና እግዚአብሔር እዩ። ኣብ ብሉይ ኪዳን ንእስራኤላውያን ናብ ቤተ መቅደስ ክቀርቡ ከለዉ መባእ ወይ ድማ ህያብ ሒዞም ክቀርቡ ከምዝግብኦም ተኣዚዞም ነበሩ። <<  እግዚአብሔር ድማ ንሙሴ ኸምዚ ኢሉ ተዛረቦ ንደቒ እስራኤል መባእ ኪህቡኒ ተዛረቦም። እቲ መባአይ ከኣ ካብ ነፍሲ ወከፍ ሰብ ብልቡ ኺህብ ዝፈተወ ውሰዱ። እታ ኻባታቶም እትወስድዎ መባእ ድማ እዚ እዩ። ወርቅን ብርሩን ኣስራዝን ሰማያዊ ሕብሪ ቀይሕን ጽሩይ ቀይሕን ጻዕዳ ፈትልን፣ ጸጉሪ ጤል ድማ እተቖርጸ ቑራብቲ፣ ደዓውልን ቁራብቲ፣ ትሃስን ዕጨይቲ ሽጢምን፣ ዘይቲ ንቐንዲል ቀመማት ንመቕብኢ ዝኸውን ዘይቲ፣ ንጥዑም ዝጨናኡ ዕጣን ድማ ኣእማን ዕንቁን ንኤፎድን ንሳንቃ ኣብ ልብን ዚዛነቕ ኣእማንን ……>> ዘጻ.25፣1።

  ኣብ ሓዲሽ ኪዳን̕ውን መባእ ሒዝካ ናብ ቤተ መቅደስ ምቅራብ ከምዝግባእ በዚ መልክዕ ተሓቢሩ እዩ።  <<  ወእምከምኬ ታበውእ መባእከ ውስተ ምሥዋዕ ወበህየ ተዘከርከ ከምቦ እኁከ ዘተኀየሰከ ። ኅድግ ህየ መባእከ ውስተ ምሥዋዕ፣ ወሑር ቅድመ ተኳነን ምስለ እኁከ ወእምዝ ገዚአከ አብእ መባእከ ። እምበኣር መባእካ ናብ መሰውኢ እንተ ኣምጻእካ ሓውኻ ሓዚኑልካ ምህላዉ ኸኣ ኣብኡ እንተ ሓሰብካ። ነቲ መባእካ ኣብኡ ኣብ ቅድሚ መሰውኢ ሕደጎ ኪድ ቅድም ምስቲ ሓውኻ ተዐረቕ ደሓር ድማ ተመሊስካ መባእካ ኣቕርብ። >> ማቴ. 5፣-23-24።  ኣብዚ ምዕራፍ ጐይታና መድኃኒና ኢየሱስ ክርስቶስ ዘምሃሮ ብዛዕባ ዕርቒ እንተኾነ ኣብ ውሽጡ ግና መባእ ምቅራብ፣ ሽምዓ፣ ዕጣን ጥዋፍ ዘቢብ መጋረጃ፣ ጽላል …   ሒዝና ምቅራብ ከምዝግባእ ተገሊጹ እዩ።

በዚ መሰረት መንፈሳዊ ሰብ ናብ ቤተመቅደስ ክኸይድ ከሎ <<  ኢትቁም ዕራቅከ ቅድመ እግዚአብሔር ፣ ኣብ ቅድሚ እግዚአብሔር ጥራይ ኢድካ ኣይትቕረብ >> ከምዝተባህለ ሓሲቡ ዓቅሙ ከምዝፈቀዶ ንእግዚአብሔር መባእ ምቅራብ ይግብኦ እዩ።

ቅዱስ ዳዊት <<  ካብ ኢድካ ዝተቀበልናዮ መሊስና ሃብናካ።>>   ከምዝበለ ካብ እግዚአብሔር ዝረኸብናዮ ንእግዚአብሔር መባእ ጌርና ምቅራብ በረከት ምርካብ ማለት እዩ።

ኣቦና ኣብርሃም ኣብ ቅድሚ መልከጼዴቅ ኣብ ዝቐረበሉ እዋን ናይ ጐይታና መድኃኒና ኢየሱስ ክርስቶስ ደምን ሥጋን ኣብነት ዝኾነ ህብስትን ወይንን ኣቐቢልዎ እዩ። ኣብርሃም ድማ ካብ ኩሉ ኣስራት ንመልከጺደቅ ሂብዎ እዩ። ዘፍ.14፣17። ሎሚ̕ውን ካህናት ከም ናይ መልከጼድቅ ሥርዓት ቅዱስ ሥጋኡን ክቡር ደሙን ወልደ እግዚአብሔር ከቐብሉ ከለዉ ፣ ምእመናን ድማ ከም ኣብርሃም ኣስራት ቡኩራት ንቤተክርስቲያን የቅርቡ። ናብ ኣበው እንዳወረደ ዝመጻና ካብ እግዚአብሔር ዝተኣዘዘ ስለዝኾነ እዩ ። ስለዚ ነዚ ክንሓስብ ከለና ብኣጋጣሚ ወይ ድማ ሃንደበት ፣ሰብ ክገብር ርእዩ ዘይኮነ ትእዛዝ ምዃኑ ሓሲቡ ናብ ቤተመቅደስ ዝቐርብ ሰብ ብዝተኻእሎ መጠን ግቡእ ዝኾነ መባእ ሒዙ ምቅራብ ይግብኦ።

መ. ብትእምእርተ መስቀል ኣማዕቲቡ ኣፍደገ ቤተመቅደስ ( ደገ ሰላም ) ምስላም።

ምምዕታብ

 ኣፍደገ ቤተመቅደስ ምስ በጻሕና ኣቀዲምና ብኣምሳል ትእምርተ መስቀል ነማዕትብ ። እዚ ከኣ መንፈሳዊ ትርጉም ኣለዎ።

1.ናይ ምምዕታብ መንፈሳዊ ትርጉም።

ኣእዳውና ብትእምርተ መስቀል ድሕሪ ምምስቃልና ካብ ላዕሊ ናብ ታሕቲ (ካብ ግንባርና ናብ ደረትና) ንወርድ፣ እዚ ከኣ ወልደ እግዚአብሔር ኢየሱስ ክርስቶስ ካብ ሰማየ ሰማያት ምውራዱ ዘመልክት እዩ። ብምቅጻል̕ውን ኣእዳውና ናብ ጸጋማይን መንኮንባ ንወስድ እሞ መሊስና ናብ የማናይ መንኮብና ነምጽኦ።

ካብ ሰማየ ሰማያት ብፍሉይ ኣካሉ ብተወላድነቱ ክብሩ ዝወረደ ቃለ እግዚአብሔር፣ ወልደ እግዚአብሔር ኢየሱስ ክርስቶስ ናብ ጸገም (ናብ ሲኦል) ብኣካለ ነፍሲ ከምዝወረደ ንነፍሳት ናብ የማን (ናብ ገነት) ከምዘሳገረና ንምምልካት እዩ። ብሓፈሻኡ ብምሥጢረ ሥጋዌ ዝተፈጸመልና ናይ ድኅነት ሥራሕ ንምስክር። በቲ ሓደ ከኣ ካብ ጸጋም ናብ የማን ምለሰና ማለት እዩ።

ሀ. ከማዕትብ ከለና ንዝክሮም ምሥጢራት

ኣጻብዕትና ብትእምርተ መስቀል ኣመሳቂልና ከነማዕትብ ከለና ብኅሊና ንዝክሮምን ነመላልሶም ፣ ልቦናና ዝሓስቦም ዝተፈለላዩ ምሥጢራት ኣለዉ። ዝተወሰኑ ካብኦም ምስ እንርኢ።

1. ከነማዕትብ ከለና ጐይታና መድኃኒና ኢየሱስ ክርስቶስ ስለ ድኅነትና ኢሉ ኣብ ልዕሊ መስቀል ከምዝሞተልና ንምስክር።

ቅዱስ ጳውሎስ ብዛዕባ ቅዱስ ቁርባን ኣብ ዘምሃሮ ምዕራፉ  <<አምጣነ ትበልዕዎ ለዝንቱ ኅብስት ወትሰትይዎ ለዝንቱ ጽዋዕ ሞቶ ለእግዚእነ ትዜንዎ እስከ አመ ይመጽእ -። ማለት እዛ እንጌራ እዚኣ ብትበልዕዋ እዛ ጽዋእ እዚኣውን ብትሰትይዋ መጠን ክሳዕ ጐይታ ዝመጽእ ሞቱ ትነግሩ ኢኹም። >>   1ይቆረ.11-26። ክርስቲያን ጐይታና መድኃኒና ኢየሱስ ክርስቶስ ዳግማይ ስጋብ ዝመጽእ ሞቱን ሕማሙን በብግዚኡ በብሰዓቱ ምሕሳብን ምዝካርን ይግብኦ። ሞት ኢየሱስ ክርስቶስ ንዛረቦ ኣብ እዋን ቁርባን ፣   ሥጋ ወደሙ ወልደ ክርስቶስ ክንቅበል ከለና   ከምቲ ብትእምተ መስቀል ኣማዕቲብና ኣብ ቅድሚ ፊት ቤተ መቅደስ ምሥዋእ  ጥራሕ ክኸወን የብሉን ። ካብዚ ወጻኢ̕ውን ኣብ ጉዕዞና፣ ኣብ እዋን ኣብ መግቢ ፣ ኣብ እዋን ሥራሕ ወዘተ….. ኣብ ዝተፈላለዩ እዋን ከማዕትብ ይግባእ። እዚ ከኣ ጐይታና መድኃኒና ኢየሱስ ክርስቶስ ኣብ መልዕልተ መስቀል ኣብ ቀራንዮ (ጎልጎታ) ከምዝሞተልና ንምምስካር እዩ።

2. ከማዕትብ ከለና እግዚአብሔር ንዓና ዘለዎ ፍቕሪ ንሓስብ ።

ጐይታና መድኃኒና ኢየሱስ ክርስቶስ ኣብ መዋእለ ትምህርቱ << ሰብ ንህይወቱ ኣብ ክንዲ ኣዕሩኽ በጃ ኼሕልፍ ካብዚ ዚዓቢ ፍቕሪ የልቦን >> ዮሓ.15፣13። ብምባል ሰውነቱ ንኻልእ በጃ ጌሩ ንሕማም ንሞት ኣሕሊፉ ምሃቡ ካብዚ ንላዕሊ ዝዓቢ ፍቕሪ ከምዘየለ ተዛሪቡ እዩ። ሓቀኛ ፍቕሪ ፣ ፍጹም ፍቕሪ ስጋብ ሞት የብጽሕ እዩ። እዚ ፍጹም ፍቕሪ ዝረኣናዩ ዝፈለጥናዮን ከኣ ብወልደ እግዚአብሔር ብኢየሱስ ክርስቶስ ሞት እዩ። እሱ ስለና ኣብ ልዕሊ መስቀል ተሰቂሉ ሞይቱልና እዩ። ናብ ባህርይ ኣብኡ እግዚአብሔር አብ̕ውን ንወዱ ንሞት ኣሕሊፉ ብምሃቡ ፍቕሩ ገሊጹልና እዩ። ቅዱስ ዮሓንስ ብዛዕባ እዚ ክገልጽ ከሎ << እግዚአብሔር በቲ ሓደ ወዱ ዝኣመነ ኹሉ ናይ ዘልዓለም ህይወት ምእንቲ ኺረክብ እምበር ከይጠፍእሲ ንወዱ በጃ ክሳዕ ዚህብ ክሳዕ ክንድዚ ንዓለም ኣፍቀራ። >> ዮሓ. 3፣16።

እግዚአብሔር ንወዱ በጃ ዓለም ጌሩ ምሃቡ ብእኡ ዝኣመነ ኩሉ ከይጉዳእ ብሞት ናይ ወዱ ናይ ዘልዓለም ህይወት ክረክብ ምእንቲ ሊእኽዎ። ንወዱ ዝኣመነሉ << ተኀድገ ለኪ ኃጢአተኪ፣ ተኀድገ ለከ ኃጢአተከ ። ሓጢያትካ ተሰርዩልካ፣ ሓጢያትኪ ተሰሪዩልኪ። >> ንኽብል ሊእኽዎ ኢሉና። ከነማዕትብ ከለና ንሓስቦ ነዚ ናይ እግዚአብሔር ፍቕሪ እዩ። እግዚአብሔር ስጋብ ኣብ መስቀል ተሰቂሉ ምማቱ ማዕረ ክንደይ ከምዝፈተወና ዝገልጽ እዩ።

3. ከነማዕትብ ከለና ናይ ሓጥያት ዓስቢ ሞት ምዃኑ ንዝክር።

ኣምላኽና መድኃኒና ኢየሱስ ክርስቶስ ስለና ቅድሚ ኣብ መስቀል ምስቃሉ ደቂ ሰባት ብዝበደልናዩ በደል ምኽንያት ሞይትና ነበርና ። ሞት ጽላሉ ኣጽሊሉልናን ረጊጹና ይነብር ኔሩ። ጐይታና መድኃኒና ኢየሱስ ክርስቶስ ኣብ ልዕሊ መስቀል ዝተሰቕለ ንሞትና ብሞቱ ከጥፍኣልና፣ እሱ ኣብ ክንዳና በጃ ኮይኑ ክመውት እዩ። ቅዱስ ጳውሎስ << ንሕና ኩላትና ኸኣ ነቲ ናይ ሥጋን ናይ ሓሳባትን ድሌት እናገበርና ቀደም ብትምኒት ሥጋን ምሳታቶም ንነብር ነበርና ከምቶም ካልኦትውን ብባህርይና ደቂ ቑጥዓ ነበርና። ግናኸ እቲ ብምሕረት ሃብታም ዝኾነ ኣምላኽ ምእንቲ እታ ብእኣ ዘፍቐረና ዓባይ ፍቕሩ ንዓና ብበደልና ምውታት ከሎናስ ምስ ክርስቶስ ህያዋን ገበረና። ብጸጋ ኢኹም ዝደሓንኩም ምስኡውን ኣተንሥኣና።  > ኤፌ.2፣5። ብምባል ይነግረና። ስለዚ ከነማዕትብ ከለና ካብ ክፋእ ትምኒት ዝጸነስ ሓጥያት ዓስቡ ሞት ምዃኑ ንዝክር። ኣምላኽና መድኃኒና ኢየሱስ ክርስቶስ ንሕና ብዝበደልናዮ በደል ሞት ዝተፈርደና ንሱ ናትና ሞት ሞይቱ። ኣብ መስቀል ተሰቂሉ። ኣድሒኑና። ካብ ጸልማት ሓጥያት ናብ ብርሃን ነጻነት ኣሚጺኡና እንዳበልና ውዕለቱ ንዝክር።

4. ከነማዕትብ ከለና መስቀል ኃይልና ምዃኑ ንሓስብ።

ሓዋርያ ቅዱስ ጳውሎስ <<  ቃል መስቀል ነቶም ዝጥፍኡ ዕሽነት እዩ። ንዓና ንንድኅን ግና ኃይሊ እግዚአብሔር እዩ።>> 1ይቆረ.1፣18። ቅዱስ ኣትናቴዎስ <<  አስተኀፈረ ኃጢአት በዲበ ምድር ወአብጠለ ሞተ በውስተ ሲኦል ወሰዐረ መርገመ በዲበ ዕፅ መስቀል ወነሠተ ሙስና በውስተ መቃብር ። ንሓጥያት ኣብ ምድሪ የሕፊርዎ። ንሞት̕ውን ኣብ ሲኦል፣ ንመርገም ኣብ ልዕሊ መስቀል ኣጥፊእዎ። >> ኢሉ እዩ።  መስቀል ሞት ዝተሳዕረሉ ስለዝኾነ ከነማዕትብ ከለና ብመስቀሉ ጸጋ ምሃቡ፣ ንሞት ሲዒሩ ምትንሥኡ ንዝክር። ሎሚ̕ውን ብኃይሊ መስቀል ንዝመጻና ናይ ጸላኢ ሰናያት ፈተና ንስዕሮ ። ብመስቀሉ በረከትን ኃይልን ንምላእ።

5. ከነማዕትብ ከለና ጸላኢና ( ዲያብሎስ ንኣጋንንቲ) ነሕፍሮም።

<<  ብመስቀሉውን   ነቲ ጽልኢ ብእኡ ቐቲሉ (ንዲያብሎስ ብመስቀሉ ሲዒሩ)   ንኽልቲኦም ብሓደ ሥጋ ምስ ኣምላኽ ኣተዓረቖም ንኽልቴና ብእኡ ብሓደ መንፈስ ናብ ኣቦ መእተዊ ስለ ዘሎና ኸኣ ንዓኻትኩም ርሑቓት ዝነበርኩም መጺኡ ሰላም ኣበሰረኩም፣ ነቶም ቀረባ ዝነበሩውን ሰላም ኣበሰሮም። >>  ኢፌ.2፣16።  (ንዲያብሎስ ብመስቀል ሲዒሩ)    ንዲያብሎስ << ጽልኢ>> ዝበሎ ብግብሩ ክጽውዖ ከሎ እዩ። ዲያብሎስ ዝተሳዕረ ብመስቀል እዩ። ጐይታና መድኃኒና ኢየሱስ ክርስቶስ ኣብ ፅጸ መስቀል ተሰቒሉ ንዲያብሎስ ብኣውታረ ንፋስ ብእሳት ሰንሰለት ሒዙ ኣሲሩ ሰቂልዎ። ብመስቀል ኣምሳል ከነማዕትብ ከለና ናይ ድኅነትና ምልክት ስለዝኾነ ሓፊሩን ፈሪሑን ይርሕቐና።

6. ከነማዕትብ ከለና ስለና ዝተሰቅለልና ኣምላኽና መድኃኒና ኢየሱስ ክርስቶስ ናቱ ተኸተልቲ ወገናት ምዃን ንምስክር።

ብኣምሳለ ትምእርተ መስቀል ከነማዕትብ ከለና፣ ንመስቀሉ ኣብ ክሳድና ክንኣስሮ ከለና፣ ኣብ ልብስና ኣብ ቤትና ኣብ ካልእን ጌርና ክንርአ ከለና፣ ንኣምላኽና መድኃኒና ኢየሱስ ክርስቶስ ምእማንና ንምስክር። ዝርእዩና ኩሉ ከኣ በቲ ዝተሰቕለ መድኃኒ ዓለም ኢየሱስ ክርስቶስ ከም ንኣምን ይርድኡ። ኣብዚ ድማ << ኣብ ቅድሚ ሰብ ዝተኣመነኒ ኹሉ ኣነ ኸኣ ኣብ ቅድሚ እቲ ኣብ ሰማያት ዘሎ ኣቦይ ክእመኖ እየ።>> ማቴ.10፣30። ኣብ ቅድሚ እዛ ዓለም ኣብ ቅድሚ ሰብ ዝመሰከረለይ ኣብ ቅድሚ ሰማያዊ ኣቦይ ወደይ ፈታዊየይ ክብሎ̕የ ዝተባህለ ቃልኪዳን ተጠቐምቲ ንኸውን። ኣይሁድ ብኽፍኣት ኣብ ቀራንዮ (ጎልጎታ)ኣብ ልዕሊ መስቀል ዝሰቀልዎ፣ ዝሞተ ኣብ መበል ሳልሳይ መዓልቲ ንሞት ሲዒሩ ዝተሥአ ናይ ኣምላኽና መድኃኒና ኢየሱስ ክርስቶስ ሰዓብቲ (ተኸተልቲ) ምዃና ኣብ ኣደባባይ መስኪርና በረከት ንረክብ።

ኣፍ ደገ ቤተ መቅደስ (ደገ ሰላም) ምስላም

  

ይቕጽል…….  ብሰላም የጽንሓና።

ኣምላከ ቅዱሳን እግዚአብሔር በረከቱን ረዲኤቱን የብዝሓልና። ወላዲተ አምላክ ቅድስተ ቅዱሳን ድንግል ማርያም ብኣማላድነታ ኣይትፈለየና። 

(For those who do not have Geez, please check this link) BETE MEKDES EGZIABHER (4)

ወስብሐት ለእግዚአብሔር። 

ወለወላዲቱ ድንግል። 

ወለመስቀሉ ክቡር!

ቅድስቲ ሳራ

በስመ ወወልድ ወመንፈስ ቅዱስ አሃዱ አምላክ አሜን!

 ሚያዝያ 25 ኣብዚ ዕለት ሳራን ክልተ ደቃን ኣኽሊል ሰማዕትነት ዝተቀበሉሉ እዩ። እዛ ቅድስት ኣደ በዓልቤታ ሶቅራጥስ ዝስሙ ሓለቃ ንጉሥ ዲዮቅልጥያኖስ እዩ ነይሩ። ሶቅራጥስ ንጉሥ  መከራ ከየብዝሓሉ  ብምፍራሕ ካብቲ እምነተ ክርስትና ሪሒቑ ወጺኡ ነበረ ። ቅድስቲ ሳራ ግና ነቲ ሒዛቶ ዝነበረት እምነተ ክርስትና  ክሳዕ መወዳእታ ክትሓድጎ ብብዙሕ መገዲ ዋላ እንተፈተነ፣ ካብ እምነተ ክርስትናኣ ግና  ከውጸኣ ዝከኣል ኮይኑ ኣይረኸቦን።

ቅድስቲ ሳራ  ካብቲ ዝኸሓደ ሰብኣያ ከኣ ክልተ ደቂ ወሊዳ ነበረት ። ክልቲኦም ከኣ ኣወዳት ነበሩ ። ሕቶ ጥምቀት ከኣ ዓቀበት ኮና። እዚ ከኣ ካብቲ ኣረሜን ዝኾነ ንጉሥን እቲ ዝኸድዐ ሰብኣያን ስለዝፈረሐትን እዩ ነይሩ። ፍቕራ ጽኑዕ ኣብ ከውሒ ክርስቶስ ስለዝተሰረተ ስለዝኾነ ግድነት ከምተጥምቆም ኣመነት። እዚ ኸኣ ንክልተ ደቃን ክልተ ኣገልገልታን ኣብ መርከብ ገይራ ኣንፈታ ናብ ኣሌክሳንደርያ ኣምርሐት። ንኹሉ መጻኢ ወለዶታት ከኣ ዓቢ ትምህርቲ ዝኸውን እምነት እዛ ቅድስት ኣደ ምእንቲ ክገልጽ ኣምላከ ቅዱሳን እግዚአብሔር ንማዕበል ባሕሪ ኣናወጸ። በዚ ምኽንያት ከኣ ነፍሳት ተሸበራ ኩሉ ናብ ኣምላኹ ከኣ ጸሎቱ ከዕርግ ጀመረ። እዛ ቅድስት ኣደ ሳራ፣ ነቶም ክልተ ደቃ ገና ኣብቲ ዝጥመቅሉ ቦታ ከይበጽሑ ውሉድነት እግዚአብሔር ክስእኖ ኢላ ። ብዛዕባ ድኅነቶም ኣዝያ ትጭነቅ ነበረት። ብባሕሪ ንድሕነቶም ኢላ ዝተበገሰቶ መገዲ ከይኩለፋ ምእንቲ ፣ ከምኡ’ውን እቲ ቃለ ቅዱስ ወንጌል  “ዝኣመነን ዝተጠምቀን ክድሕን ፡ እቲ ዘይኣመነ ግና ክኹነን እዩ” (ማር 16፡16)። ዝብል፣ ኣብ ኣእምሮኣ ይመላለሳ ስለዝነበረ ናብ እግዚአብሔር ጸሎታ ኣዕረገት። ሽዑ ብበሊሕ መላጸ ጌራ ነየማነይቲ ጡባ ጠቢሓ ብደማ ብትእምርተ መስቀል ኣብ ግንባሮም፡ ኣፍልቦም፡ ክልተ ከብዶም፡ ዝባኖም ኣመልኪታ ብስመ  ሥላሴ ሰለስተ ጊዜ ኣብቲ ባሕሪ ኣጥለቐቶም። ድሕሪ’ዚ ፍጹም ሰላም ኣብ ባሕሪ ሰፈነ። ኣብቲ ዝሓሰበቶ ቦታ ኣሌክሳንድርያ ከኣ ብሰላም በጸሐት።

 ኣብቲ እዋን’ቲ ፓትርያርክ ዝነበሩ ኣባ ጴጥሮስ ነቲ ናይ ጥምቐት ሥርዓት ክፍጸመሎም ወሰደቶም። ኣብቲ እዋን ካልኦት ምእማናን ደቂ እታ ከተማ ይጥምቑ ብምንባሮም ንደቂ ሳራ ከጥምቕ ከሎ እቲ ማይ ናብ ፍጹም በረድ ይልወጥ ነበረ። ካልእ ህጻን ከጥምቅ ከሎ ግና እቲ ማይ ናብ ንቡር ይምለስ። እዞም ቅዱስ ኣቦ ንደቂ ሳራ ኣብ መወዳእታ ኣጽኒሑ ነቶም ህጻናት ኣጥመቐ። ነቶም ብደም ወላዲቶም ዝተጠመቑ ህጻናት ሥርዓት ጥምቐት ክፍጸመሎም ሰለስተ ግዜ ምስ ፈተነ ወላዲቶም ክትጽዋዕ ኣዘዘ። ሳራ ከኣ ነቲ ዘጋጠመ ኩሉ ዘርዚራ ነገረቶም። ሓጥያታ ክስረየላ’ውን ለመነት። እቲ ምንታይ’ሲ ከምዚ ዓይነት ነገር ብምግባራ ተጣዕሰት። ኣባ ጴጥሮስ ግና “ኣጆኺ’ዛ ጓለይ ክርስቶስ ጐይታ ኩሉ ዓለም ባዕሉ እዩ ኣጠሚቑዎም።” ቅብኣ ቅዱስ ብምቅባእ ከኣ ሥርዓት ጥምቐት ምስ ተፈጸመሎም ናብ ዓዳ ክትምለስ ወሰነት። እቲ ከሓዲ በዓል ቤታ ግና ከይኣተወት ብምፍርራሕ ንምንታይ ናብ ኣልክስድርያ ከም ዝኸደት ክትነግሮ ኣትሪሩ ሓተታ ብሕቶውን ዓቅላ ኣጸበበላ። እዚ ከይኣኽሎ ንንጉሥ ብምሕሳብ ኣሕሊፉ ሃባ። እቲ ከሓዲ ንጉሥ ከኣ ክትገብር ናብ ኣለክሳንድርያ ከምዝኸደት ክትነግሮ ሓተታ። ከምኡ’ውን ምስቶም ክርስቲያን ዝበሃሉ ክትምንዝሪ ድኺ ኬድኪ ኡሉ’ውን ከሰሳ። እዛ ቅድስት ኣደ ግና “ክርስቲያን ኣይንምንዝርን ኢና፡ ነቲ ዝፈጠረና ኣምላኽ ገዲፍና ንዘይሰምዑን ዘይርእዩን ጣኦት ኣይነምልኽን ኢና፡ ካልእ ዝኾነ ይኹን ኣይክውስኸልካን እየ ዝገበርካዮ ግበር” ኢላ ብትብዓት መለሰት። እቲ ንጉስ ግና እንታይ ከም ዘጋጠማ ኣብ ኣሌክሳንድርያ ክፈልጥ ደጋጊሙ ሓተታ ንሳ ግና ኣይመለሰትሉን። ነቶም ወተሃደራቱ ክልተ ኣእዳዋ ንድሕሪት ኣሲሮም ክልተ ደቃ ኣብ ከብዳ ጠምጢሞም ብሓዊ ከቃጽልዎም ኢሉ ኣዘዘ። በዚ መሰረት ከኣ ቅድስት ሳራን ክልተ ደቃን ናይ ሰማዕትነት ኣኽሊል ተቀቢሎም። 

ጸሎትን በረኸትን ቅድስት ሳራ ምስ ኩልና ይኹን። ኣሜን 


(For those who does n't have Geez, please check this PDF link)KIDIST SARA

ወስብሐት ለእግዚአብሔር።

ወለወላዲቱ ድንግል።

ወለመስቀሉ ክቡር!

ቤት መቅደስ እግዚኣብሔር (3)

በስመ አብ ወወልድ ወመንፈስ ቅዱስ አሃዱ አምላክ አሜን! 

ኢየሱስ ከኣ ተንሥእ ዓራትካ ኣልዕል እሞ ኪድ በሎ። እቲ ሰብኣይ ብኡብኡ ሓወየ ዓራቱ ኣልዕሉውን ከደ። ዮሓ.5፣8-9።

ኣምላከ ቅዱሳን እግዚአብሔር ጾምና ይባርኸልና!

ቁጽሪ 4 መፃጉዕ መጋቢት ፪/11 (2004) ዓ.ም (2012)

ናይዚ ሰሙን ጽሑፍ ለ. ንጹህ ልብሲ (ክዳን ) ምኽዳን ። ትብል እያ። ሠናይ ንባብ

ለ. ንጹህ ልብሲ (ክዳን ) ምኽዳን ።

  ቤተ መቅደስ ምዑዝ መኣዛ ዘለዎ ዕጣን ንእግዚአብሔር ዝቀርበሉ፣ ምእመናን ናይ ልቦም ምንዮት ናይ ከንፈሮም ፍረ ዝኾነ ጸሎቶም ዘቅርብሉ ፣ ናይ ሓዲስ ኪዳን በጊዕ ጐይታና መድኃኒና ኢየሱስ ክርስቶስ ዝሥወኣሉ ንጹህ ቤተ ከብካብ (መርዓ) እዩ። ኣብዚ ቤት ኣብ ልዕሊ ደቂ ሰባት ብነፍስን ሥጋን ዝፈርድ ናይ ጐይቶት ጐይታ ናይ ነገሥታት ንጉሥ እግዚአብሔር ኣሎ። ኣብ ቤት'ዚ ብነፍስን ብሥጋን ንጽህት ዝኾነት ኣዴና ቅድስተ ቅዱሳን ድንግል ማርያም ኣላ። ቅዱሳን ኣለዉ።

  ስለዚ ንጸሎተ ቅዳሴ ፣ ንጸሎተ ኪዳን ፣ ንሰዓታት ጸሎት ናብ ቤተ መቅደስ ዝኸይድ ሰብ ነዚ ክርድኦን  ክሓስብን ይግብኦ። ንሰማያዊ ከብካብ ( መርዓ) ኣብ ቅድሚ ንጉሥ ሰማይን ምድርን ደው ከምዝብልን ፣ ምስ ቅዱሳን ብኽብሪ ከምዝዕደም ሓሲቡ ልብሱ ንጹህ ብምግባር ምድላው ይግብኦ። ሰብ ከምቲ ጎረቤት ወይ ዓርኩ መቕርቡ ንመርዓ ምስ ዝጽዎዖ እንታይ ከምዝለብስ ብምሕሳብ ከምዝጭንነቅ ኩሉ፣ ናብቲ ዝዓበየ መርዓ ቅዳሴ ክቀርብ ከሎ ንዓይኒ ደስ ዘይብል ብዘየገድስ ተራ ልብሲ (ክዳን) ተኸዲኑ ዝኸይድ ኣሎ። ኣብ ቅድሚ ምድራዊ በዓል ሥልጣን ክቐርብ ከሎ ንልብሱ ሓጺቡ ኣጽርዩ ማዕርጉ ዝቐርብ ሰብ፣ ኣብ ቅድሚ ንጉሠ ሰማይ ወምድር እግዚአብሔር ክቐብር ከሎ ግና ግዲ ዘይብሉ ሸለልትነት ዘብዝሕ ሰብ ኣሎ፣ እዚ ግና ዝዓበየ ጌጋ እዩ።

  ኣቦና ያዕቆብ ኣብ ናይ ኣብኡ ላባ ቤት ንዓሰርተ ኣርባዕተ ዓመት ድሕሪ ምንባሩ እግዚአብሔር ናብ ቤትኤል ተመሊሱ መሥዋእቲ ክሥውእ ምስኣዘዞ  ንኹሎም ቤተሰቡ ክዳኖም ክቅይሩ ኣዚዝዎም እዩ ። <<  ሽዑ ያእቆብ ንስድራኡን ምስኡ ንዝነበሩ ኹሎምን ኣብ ማእከልኩም ዘለዉ ጋኖት ኣማልኽቲ ኣርሕቑ፣ ጽረዩ ክዳውንትኹም'ውን ለውጡ። ንተንሥእ ናብ ቤትኤል ድማ ንደይብ ኣብኣ ከኣ ነቲ ብመዓልቲ ጸበባይ ዝሰምዓንን ኣብ ዝኸድክዎ መገዲ ምሳይ ዝነብረን ኣምላኽ መሰውኢ ኽገብር እየ በሎም።>> ዘፍ.35፣2።

  ስለዚ ናብ ቅድስቲ ቤተክርስቲያን ኣብ ንኸደሉ እዋን ካብቲ ናብ ስራሕና ኮነ ዝተዓደምናዮ ምድራዊ መርዓ (ከብካብ) ንዳለዎ ንላዕሊ ተዳሊናን ጸሪናን ንጹህ ልብሲ ለቢስና ክንከይድ ይግበኣና። ሓደ ሓደ ግዜ ኣብ ቅድስቲ ቤተክርስቲያን ክብረ በዓላትን ኣብ ካልእ እዋንን ካብ ብዝሒ ምእመናን ዝተላዕለ ክዕፈን ይኽእል እዩ።  ኣብ ከምዚ ዝበል እዋን ንጹህ ልብሲ ዘይለስቡን ተዳልዮም ብዘይመጹ ሰባት ሽታ፣ ጸገም ይፍጠር እዩ። ምእመናን ሕልናኦም ኣኪቦም  ብኣንቃዕዶ ልቦና ክጽልዩ ኣይክእሉን። ካብ ኩሉ ንላዕሊ ድማ  ብሰማያዊ ክብሪን ኣምሳልን ዝተሸለመትን ዝመዓረገትን ቅድስቲ ቤተክርስቲያን ነርስሓ እሞ ተሓተቲ ንኸውን። እዚ ከምዚ ከይከውን ካህን ምእመን ከይተባህለ ኩሉ ዓቅሙ ብዝፈቅዶ ተዳልዩ ብንጽህና  ክቐርብ ይግባእ።

1. ልብሲ ምዕጣቕ ወይ ብትእምርተ መስቀል ምኽን:

  ናብ ቤተ መቅደስ ክንከይድ ከለና ጻዕዳ ክዳን ክንክደን ይግባእ እዩ። ጻዕዳ ነጸላ፣ ጋቢ ተዓጢቅና ወይ ድማ ብትእምርተ መስቀል በዚ መልክዕ ተኸዲንና ናብ ቤተ መቅደስ በጺሕና ደው ኢልና እንሓስቦም ምሥጢራት ኣለዉ።

1.1 ንምንታይ ብትእምርተ መስቀል ንኽደን፤

  ናይ ክርስቶስ መከራ ንምሕሳብ። -ነጸላ ናብ የማንን ጸጋምን ብትእምርተ መስቀል ኣምሳል ይዕጸፍ። ኣብዚ እዋን ጐይታና መድኃኒና ኢየሱስ ክርስቶስ ኣብ ዕለተ ዓርቢ ዝተቐበሎም ጸዋትወ መከራን ኣብ ቀራንዮ ኣብ መልዕለተ መስቀል ምስቃሉ የዘኻኽረና። እዚ ዝተማሳቀለ ነጸላ ዝርኢ ኩሉ ናይ ጐይታና መድኃኒና ኢየሱስ ክርስቶስ መከራ መስቀል ምቕባሉ ይዝክር።

1.2 ንምንታይ ጻዕዳ ንለብስ ። -እቲ ንኽደኖ ነጸላ ጻዕዳ ምዃኑ ዝተፈላለየ ምኽንያት ኣለዎ። 


ካቡኡ ዝተወሰነ፣-

ዝጽበየና ሰማያዊ ክብሪ ንምሕሳብ:- 


ኣብ ልዕሊ ምድሪ ብብዙሕ መከራ ተፈቲኖም ዝሓለፉ፣ ዳሕራይ ንኽብሪ ዝበቅዑ ቅዱሳን፣ ኣብ ሰማይ ናይ 
ክብርን ቅድስናን ምስክር ( መግለጺ) ጻዕዳ ክዳን ይወሃቦም ማለት ብርሃን ይለብሱ ፣ ብሓድነት ይዝምሩ። 
<< ነቲ ሓምሻይ ማሕተም ምስ ፈትሖ ከኣ ነፍሳት እቶም ስለ ቃል ኣምላኽን ስለቲ ዝነብሮም ምስክርን 
እተሓርዱ ኣብ ጥሕቲ መሰውኢ ርአኹ። ዓው ብዝበለ ድምጺ ከኣ ዎ ቅዱስን ሓቐኛን ጎይታ ክሳብ መዓስ ኢኻ 
ዘይትፈርድ ነቶም ኣብ ምድሪ ዘለውኸ ክሳብ መዓስ ኢኻ ሕነ ደምና ዘይትፈድዮም እናበሉ ጠርዑ። ንነፍሲ 
ወከፎም ድማ ጻዕዳ ኽዳን ተዋህበቶም እቶም ከማታቶም ኪቕተሉ ዘለዎም ብጾቶም ባሮትን ኣሕዋቶምን ክሳዕ 
ዝምልኡ ከኣ ገና ቕሩብ ኪዐርፉ ተባህለሎም።>> ራእ. 6፣-9-11።

 <<  ሓደ እካ ኪቆጽሮም ዘይኽእል ብዙሓት ሰብ ጻዕዳ ኽዳውንቲ ተኸዲኖም ጨነፍር ስየ ኣብ ኣእዳዎም ሒዞም ኣብ ቅድሚ እቲ ዝፋንን ኣብ ቅድሚ እቲ ገንሸልን ደው ኢሎም ርአኹ..…  >> ራእ.7፣9።  ። ብምባል ኣብ ሰማይ ብክብሪ ዝነብሩ ቅዱሳን ብርሃን ለቢሶም ብርሃን ተጎናጺፎም ከምዝረኣዮም ቅዱስ ዮሓንስ ገሊጹልና። ንሕና̕ውን ብሃይማኖት ምግባርን ጸኒዕና እንተሓሊፍና ኣብ ሰማይ እዚ ዓቢ ክብሪ ይጽበየና ፣ ነዚ ብምሕሳብ ጻዕዳ ክዳን ንኽደን።

  ካብዚ ብተወሳኺ ጻዕዳ ክዳን ክንክደን ከለና ብርሃን ዝለበሱ ቅዱሳን ምሳና ምህላዎም ኣብ ከባቢና'ውን ከምዝለዉ ብዛዕባና ስለና ከምዘማልዱ ንዝክር። እብ. 12፣1።

ቅዱሳን መልኣኽቲ ምሳና ምኻኖም ንምሕሳብ:-

  ጐይታና መድኃኒና ኢየሱስ ክርስቶስ ሙስን መቃብርን ኣጥፊኡ ንሞት ሲዒሩ ድሕሪ ምትንሥኡ ንሥጋኡ ቅዱይ ቅብኢ ክቐብእዎ ናብ መቓብር ዝወረዳ ቅዱሳን ኣንስቲ፣ ቅዱሳን መልኣኽቲ ካብ በረድ ንላዕሊ ዝጻዕደወ ጻዕዳ ክዳን ተኸዲኖም ተገሊጾምለን እዮም።  <<  ወማርያምሰ ቆመት ኀበ መቃብር አፍኣ ወትበኪ፣ ወእንዘ ትበኪ ሐወጸት ውስተ መቃብር ። ወርእየት ክልኤተ መላእክተ በጸዓድው አልባስ፣ ወይነብሩ አሐዱ ትርአስ ወአሕዱ ትርጋፀ ኀበ ነበረ ሥጋሁ ለእግዚእ ኢየሱስ ።  ማርያም ግና ኣብቲ ኣፍ መቓብር ደው ኢላ ትበኪ ነበረት እናበኸየት ከኣ ናብቲ መቓብር ድንን ኢላ ኣብቲ ሥጋ ኢየሱስ ክርስቶስ ዝነብሮ ጻዕዳ ኽዳውንቲ እተኸድኑ ኽልተ መልኣኽ ሓደ ብትርኣስ ሓደ ከኣ ብትርጋጽ ረኣየት … >>  ። ዮሓ. 20፣11-12።

ጻዕዳ ተኸዲንና ከነቀድስ ከለና ናይ ቅዱሳን መልኣኽቲ ረዲኤቶምን ሓለዋኦምን ካባና ከምዘይፍለ፣ ኩሉ ግዜ ኣብ ጎንና ከምዝዀኑ ንዝክር።

ምስ ጐይታና መድኃኒና ኢየሱስ ክርስቶስ ከምዘለና ንሓስብ:-

ጐይታና መድኃኒና ኢየሱስ ክርስቶስ ብርሃነ መለኮቱ ኣብ ደብረ ታቦር ክገልጽ ከሎ ክዳኑ ከም በረድ ጻዕዳ ኮይኑ እዩ። << ወእምድኅረ ስሱ መዋእል ነሥኦም እግዚእ ኢየሱስ ክርስቶስ ንጴጥሮስ ወለያዕቆብ ወለይሐንስ እኁሁ፣ ወአዕረጎሙ ውስተ ደብር ነዋኀ እንተ ባሕቲቶሙ። ወተወለጠ አርአያሁ በቅድሜሆሙ፣ ወአብርሀ ገጹ ከመ ፀሐይ ወአልባሲሁኒ ኮነ ጸዐዳ ከመ በረድ ።  ድሕሪ ሽዹሽተ መዓልቲ ድማ ኢየሱስ ንጴጥሮስን ንያእቆብን ንዮሓንስ ሓዉን ወሲዱ ንበይኖም ናብ ነዊሕ ከረን ኣደየቦም። ኣብ ቅድሚኦም ከኣ ትርኢቱ ተለወጠ፣ ገጹ ከም ጸሓይ ኣብርሄ ክዳኑ̕ውን ከም ብርሃን ጻዕደወ ። >> ማቴ. 17፣1-2።

  ኣብ ደብረ ታቦር ብርሃነ መለኮቱን ምሥጢረ መንግሥቱን ዝገለጸ ኣብ ቅድሚ ኣእማደ ሓዋርያት ገጹ ክልወጥ ደቂ መዛሙርቱ ክርእይዎ ዝፈቀደ ኣምላኽ ምሳና ከምዘሎ ብምሕሳብ ኣብ ቅድስቲ ቤተክርስቲያን ጻዕዳ ክዳን ተኸዲንና ንቀውም፣ ንመላለስ።  ከሙኡ ከኣ ምሥጢረ ሥላሴ፣ ምሥጢረ ሥጋዌ ዝእመነላ፣ ዝንበበላ፣ ዝትርጎመላ፣ ኣማናዊት ደብረ ታቦር ቤተክርስቲያን ከምዝዀነት ብምሕሳብ ጻዕዳ ንኽደን።

ሐ. መባእ (ህያብ) ሒዝካ ምቅራብ።

ይቕጽል…….  ብሰላም የጽንሓና።

ኣምላከ ቅዱሳን እግዚአብሔር በረከቱን ረዲኤቱን የብዝሓልና። ወላዲተ አምላክ ቅድስተ ቅዱሳን ድንግል ማርያም ብኣማላድነታ ኣይትፈለየና።

(For those who  do not have Geez try this link): BETE MEKDES EGZIABHER (3)

ወስብሐት ለእግዚአብሔር።

ወለወላዲቱ ድንግል።

ወለመስቀሉ ክቡር።