ምኽሪ ለባማት

+ በስመ ኣብ ወወልድ ወመንፈስ ቅዱስ ኣሃዱ ኣምላክ ኣሜን!!!

ክልተ ኣሕዋት ሃብታማት ዝነበሩ እዋን ኣርኪቡዎም ሃብቶም ኣብቂዑ ድኽነት ኣርኪባቶም ካብቲ ዝነበሩዎ ከተማ ክስደዱ ተገደዱ። እቲ ሓደ ኣብ ለባም ሰብ ተዓስበ እቲ ካልኣይ ከኣ ኣብ ደሓን ዝኾነ ሃብታም ተዓስበ።

ድሕሪ ነዊሕ እዋን ናብ ዓዶም ክምለሱ ምስ ሓሰቡ፡ እቲ ምስ ለባም ዝነበረ “ክንድዚ ዚኣክል ዓመታት ምሳኻ ሰሪሐ ሕጂ ግና ናብ ቤተ ሰበይን ዓደይን ክኸይድ እንታይ ትመኽረኒ፤” በሎ። እቲ ለባም ሰብኣይ ከኣ ምስትውዓሉ ርእዩ ከምዚ ኢሉ መለሰሉ። “ነቲ ዝህበካ ምኽሪ ካብቲ ሒዝካዮ ትኸይድ ገንዘብ ክውሕደካ እዩ” ይብሎ። እቲ መንእሰይ ከኣ “ኣይፋልካን ደኣ ምኽርኻ ካብ ገንዘብ ንላዕሊ እዩ” ኢሉዎ። እቲ ለባም ሰብኣይ ከኣ “በል ሓንቲ ምኽሪ ብ500 ዲናር እየ ክህበካ” በሎ። እቲ መንእሰይ ከኣ 2000 ዲናር ጥራይ ነበሮ። ሕራይ ኢሉ ከኣ በቲ ዝበሎ ተሰማሚዑ።

1. ብትፈልጦ መንገዲ እምበር ብዘይትፈልጦ መንገዲ ኣይትኺድ። ወስኸኒ ደኣ ይብሎ እቲ መንእሰይ።
2. ዘምጽኣካ ደኣ እምበር ዘይምጽኣካ ኣይትግበር። “ኣይዓገብኩን ምኽርኻ መግበኒ ደኣ። ምኽንያቱ ገንዘብ ኣብ ቅድሚ ምኽርኻ ዋጋ የብሉን” ይብሎ።
3. ንእትወስዶ ውሳኔ 3 ጊዜ ሓሲብካ ፈጽሞ። ይብሎ።

እቲ መንእሰይ ወላ’ታ ተሪፋቶ ዝነበረት 500 ዲናር ኣይበቀቃን። ኣብ መንገዲ እንታይ ይጸንሓኒ ኢሉ  ኣይሓሰበን። ነዛ ተሪፋ ዘላ ክህበካ መዋእለይ ዘይጣዓሰሉ ምኽሪ ሃበኒ አሉ ለመኖ

 4. ነዛ መወዳእታ ምኸረይ ኣብ ወረቀት ጽሒፈ ክህበካ እየ። ዓድኻ ምስ በጻሕካ ክፈታ ይብሎ።

እዚ ለባም መንእሰይ ምስ ለባም ሰብ ስለ ዝነበረ ምኽሪ ሒዙ ናብ ዓዱ ይብገስ። እቲ ምስ ሃብታም ዝነበረ ከኣ ገንዘብ ጥራይ ሒዙ ይብገስ። ነቲ ዓርኩ ዝገበሮ ምስ ፈለጠ ከኣ ኣባጨወሉ።

መንገዶም ከይተበገሱ ከለው፡ ሕጽር ዝበለ በቅልጡፍ ናብ ዓድና እንበጽሓሉ መንገዲ ዘይነናዲ ይበሃሃሉ። ኣብዚ ህሞት እዚ ምኽሪ ለባም ዝሰነቀ “ኖኖእ ኣነ በታ ዝፈልጣ መንገዲ እየ ዝኸየድ” ይብሎ። በዚ መሰረት ከኣ ተፈላሉዩ። እቲ ብኣቋራጭ መንገዲ ዝኸደ መንእሰይ ኣራዊት ረኺቦም ይበልዕዎ። እቲ ምኽሪ ለባም ዝሰምዐ እሞ ዘተግበረ ገለ ከይተጐድአ ጎዕዝኡ ቀጸለ። ኣብ ሓንቲ ከተማ ምስ በጽሐ መሬት መስዩ ከሕድሮ ዝኽእል ሰብ አናድዩ፡ ከሕድረካ እየ አሉ ሓደ ሰብ ናብ ቤቱ ምስ ወሰዶ፡ ኣብዚ ጽንሓኒ መግብን መደቀስን ከምጽኣልካ እየ ኢሉዎ ይኸይድ። ኣብቲ ዝንበሮ ቦታ ሬሳታት ምስ ጸንሖ ሰንቢዱ ሕማቕ ሓሰበ። እዚ ሰብኣይ ደኣ ቀታሊ ሰብ እዩ ኢሉ ሓሰበ። ንዓይ ከኣ ከይቀተለኒ ከሎ ክቀትሎ ኢሉ ካራ ኣዋደደ። ሕስብ እንተበለ ግና ምኽሪ ለባም አስራሒኡ ዘኪሩ “ዘምጽኣካ እምበር ዘይምጽኣካ ኣይትግር” ዝብል ምኽሪ ኣብ ሓሳቡ መጾ። እዚ ሰብኣይ ንዓይ ጽቡቕ ክገብረለይ ኢሉ ኣብዚ ኣምጺኡኒ፡ ኣነ ኸኣ ከዕርፍ መጽየ እምበር እንታይ እዩ ዝገብር ኣይፈልጥን እየ። ስለዚ ሱቕ ምባል ይሕሸኒ ኩሉ ንኣምላኽ ሓዲገዮ ኣለኹ ኢሉ ብዓቕሊ ተጸቢዩዎ። እቲ ሰብኣይ መጽዩ ነቲ ዝግባእ ናይ እንግዶት መግቡ ሂቡ መደቀሲ ኣዳለወሉ። ከይተዛረበ መሬት ምስ ወገሐት ናብ ዓዱ ተበገሰ። ይቀንየለይ ዝገበርኩምለይ ከኣ ኣምላኽ ዓስብኹም ይኽፈልኩም ኢሉዎ። እቲ ሰብኣይ ከኣ በል ዝሓወይ ንስኻ ጥዑይ ሰብ ኢኻ እዞም ዝራእኻዮም ሬሳታት ዘምጽኦም ገዲፎም ዘይምጽኦም ስለዝተዛረቡኒ ማለት “ሰብይትኻ ደኣ ኣበይ ኣላ፤ ወይ እንታይ ትገብር ኣብዚ ስፍራ እዚ እና በሉ ስለዘጽበቡለይ እየ ሓሪደዮም። ንስኻ ግና ዘምጽኣካ ጥራይ ስለዝገበርካ ኣምላኽ መንገድኻ የቅንዓልካ” ኢሉ መሪቁ ኣፋነዎ። በቲ ዝገበሮ ከኣ ደስ እና በሎ ጉዕዝኡ ቀጸለ።

ዓዱ በጺሑ ቅድሚ ናብ ቤት ኣብኡ ምእታዉ፡ ስድርኡ ምርካቡ፡ ነዚ ኹሉ ዝገበረለይ፡ ብጥዕና፡ ብሰላም ዝመለሰኒ እግዚኣብሔር ኣምላኸይ ከመስግኖ ናብ ቤተ ክርስቲያን ክኸይድ። ኣብ መንገዲ ፍቑራት እናተሰዓዓሙ ናብ ቤተ ክርሰቲያን ዝኸዱ ይርኢ እሞ ይናደድ። ጽቡቕ ስለዘይገብሩ ዘለዉ ናብኦም ከይደ ክሃርሞም ኢሉ ይሓስብ፡ ግና ምኽሪ ለባም’ውን ይገትኦ። እቲ እትወስዶ ስጉምቲ 3 ግዜ ሓሲብካ ፈጽሞ ዝብል ኣብ ኣእምሮኡ ይመጾ እሞ ይሃድእ። ናብኦም ቅርብ ኢሉ እንተራኣየ፡ እቶም ፍቑራት ኮይኖም ዝተራእዩዎ፡ ኣዲኡ ሓሚማ ሓዉ ደጊፉዋ ናብ ቤተ ክርስቲያን ዝኸዱ ዝነበሩ ኮይኖም ጸንሑዎ። ነቲ ዝሓሰቦ ገሪሙዎ ንስድራቤቱ ስዑሙ ናብ ቤት እግዚኣብሔር ድርብን ዕጽፍን ገይሩ ንኣምላኹ ከመስግኖ ተተሓሒዞም ኣተው። ኣመስጊኑ ምስ እና ተመልሰ ከሎ ነታ ደብዳቤ ናይ’ቲ ለባም ኣስራሒኡ ክፍት ምስ ኣበላ ከምዚ ዝስዕብ ጸንሖ። “እተን ዝነገርኩኻ ምኽሪ ብጥንቃቀ ፈጽመን” ዝብል ቃል ጸነሖ። ምስታ ጽሕፍቲ ከኣ እተን 2000 ዲናር ናቱ ተጠቕሊለን ጸንሐኦ። ደስ እና በሎ ምስ ስድርኡ ብሓጐስ ንቤቱ ተመሊሱ።

እዛ ሓጻር ግና ቁምነገር ሓዘል ዝኾነት ዛንታ ንመሃሮ ብዙሕ እዩ። ገለ ካብኡ፡-

መጀመርያ ከምቲ ቅዱስ ቃሉ “ኣብ ቀራና ጐደናታት ደው ኢልኩም ተመልከቱ፡ እቲ ጥንታዊ መገድታትን እቲ ጽቡቕ ጐደናን ኣየናይ ምዃኑ ሕተቱ እሞ ብእኡ ተመላለሱ ሽዑ ንነፍስኹም ዕረፍቲ ከትረኽቡ ኢኹም” (ትንቢት ኤርምያስ 6፡16) ዝበሎ እታ እንኮ ጥንታዊት ጐደናና በቶም ሕሩያን እግዚኣብሔር ዝኾኑ ቅዱሳን ኣቦታት ሓዋርያት ዝተሰጋገረትልና ኣማናዊት ኦርቶዶክሳዊት ተዋህዶ እምነትና ጸኒዕና ክነብር እዩ። “ወይለኺ ኰራዚን፡ ወይለኺ ቤተ-ሳይዳ” (ሉቃ 10፡13) ከምዝበለ ወይልኹም ደቂ ተዋህዶ። ሎሚ ብመንፈስ ምጥርጣር ተመሊእና፡ ካብቶም ኣቦታትና ንሕና ንፈልጥ፡ ኣቋራጭ መንገዲ ናብ እግዚኣብሔር ረኺብና ኢና እሞ፡ ዘማልደልና ኢየሱስ (ሎቱ ስብሐት) እዩ፡ እናበልካ መፈጸምታና እቲ ቃል “ርኽሰቱ ዘይተሓጽበ ኣነ ንጹህ እየ ዝብል ወለዶ ኣሎ” (ምሳሌ 30፡12) ከይንኸውን ኣመና ምጥንቃቕ የድልየና። እታ ዝተዋህበትና መንገዲ ብትዕቢት ተዋጢርካ ምኻድ ዘይኮነ “ንሕና ዘይንጠቅም ባሮት ኢና እቲ ኽንገብሮ ዚግብኣና ኢና ዝገበርና” (ሉቃ 17፡10) ንበል። ህይወትና ክኸውን ኣለዎ እዚ ቃል እዚ። ብሓቂ ከምቲ ዘማራይ ዳዊት “ቃልካ ንእግረይ መንራህቲ ንመንገደይ ብርሃን እዩ” (መዝ 119፡105) ዝበሎ ቃሉ ተመጊብና ፍቓዱ መሊእና ክነብር ናይ ኣምላኽና ቅዱስ ፍቓዱ ይኹነልና። ምኽንያት ናይ ምፍጣርና እንተተረዲእና ኮይና ከኣ ኣብዛ ምድሪ ዓስቢ ሰማይት ክንረክብ ደኣ ተድላ ሥጋና ክንመልእ ስለዘይኮነ ተጊህና ክብሪ ዉሉድነት ዘውርሥ ስራሕ ክንሰርሕ እዩ ግቡእና። ኣብ መወዳእታ ከኣ ከምቲ ቀዳሞት ኣዳምን ሔዋንን ጸላኢ ሰናያት ኩሉ ግዜ ኣብ መንጐናን መንጐ እግዚኣብሔርን ኣሎ። ምስ እግዚኣብሔር ጽቡቕ ርክብ ክህልወና ስለዘይፈቱ ክንፍተን ኢና፡ ክንወድቕ ኢና፡ ግና ክንትንስእ ኣሎና። ምኽንያቱ እቲ ንቡር ምውዳቕና እንተኾይኑ ዘይንቡር ግና ዘይምትንሳእና እዩ። ድኻም ክስመዓና የብሉን። ምኽንያቱ ተስፋ ሰማያት ስለዘለና። እዚ ኸኣ “ንምስትውዓል እምንቲ ፈታዊተይ ኢኺ በላ” (ምሳ 7፡4) ከም ዝበለ ኣስተውዒልና ሓሲብና ተጠንቂቕና ምጉዓዝ የድልየና።

ኣብ መደምደምታ ግና ኣብ ክሳድና ንኣስሮ ማዕተብ ከም ሕላገት ካብ ኩሉ ክፉእ ዝሕልወና እዩ። ስለዚ “ወደየ፡ ንቓላተይ ዘክሮ፡ ንትእዛዛተይ’ውን ከቶ ኣይትረስዓዮ። ንትእዛዛተይ ሓልዎ እሞ ብሕይወት ክትነብር ኢኻ፡ ንሕገይውን ከም መርዓት ዓይንኻ ሓልዎ። ኩሉ ሳዕ ምሳኻ ሓዞ፡ ኣብ ሰሌዳ ልብኻውን ጽሓፎ” (ምሳ 7፡1-3) ። ይብል እቲ ቅዱስ ቃል እሞ ኣብ ልብና ሰፊሩ ቅዱስ ቓሉ ኣብ ክንዲ ሓደ 30፡ 60፡ 100 ኻዕበት ንኽንፈሪ ናይ እግዚኣብሔር ቅዱስ ፍቓድ ይኹነልና። ጀመርቲ ጥራይ ዘይኮናስ ካብቶም ፈጸምቲ ይግበረና። ፍቕሪ ኣምላኽን ጸጋ ጐይታናን ሕብረት መንፈስ ቅዱስን ምስ ኩላትና ይኹን። 

(For those who do not have Geez, please check on this link) MIKRI LEBAMAT

ወስብሐት ለ እግዚኣብሔር

ወለወላዲቱ ድንግል

ወለመስቀሉ ክቡር

ኣሜን!!!        

ተስፋ

በስመ ኣብ ወወልድ ወመንፈስ ቅዱስ ኣሓዱ ኣምላክ ኣሜን!!!

ተስፋ ካብ መዓሙቕ ጸልማት በሪ ብርሃን ከፊታ ንነፍስ ሰንከልከል ከይትብል ትሕልዋ። ተስፋ ጭንቀት ዘድረቓ ነፍሲ፡ ፈልፋሊ ማይ ህይወት ትኾና። ተስፋ ስራሕ መንፈስ ቅዱስ እያ፡ እቲ ጐይታ ዘተስፈወና መጸናነዒ መንፈስ። ብተስፋ ዝኣምን ካልእ ክጥምቶ ዘይክእል ይርኢ። ምስ ክርስቶስ ዝኾነ ይኹን ተስፋ ኣይቆርጽን እዩ። ምስ ድንቂ ዝኾነ ሰራሕ ኣምላኽ ከመይ ገይሩ ተስፋ ክቖርጽ፤ ኣምላኽ ንኹሉ ብዝመደቦን ብዝፈቐዶን እዩ ዝኾውን ዘሎን ዝነበረን ብድሕሪ ሕጅን ዝፍጸምን። ብዘይናቱ ፍቓድ ዝኾነት ትኹን ኣይትትግበርን። ንዝተዋረዱ ልዕል ዘብል ጐይታ ጐይቶት እዩ። ንሕና ምስሉን መልክዑን’ዶ ኣይኮናን፤ ስለዘፍቐረና ከኣ ድርዒ ዋልታና እዩ። ተስፋ ኣይንቆርጽን፡ ኣብ ቃል ክርስቶስ ተስፋና እናዛየደ ይኸይድ። ከመይ፤ እዚ ቃል ስለዝምግበና፡ “ስለ ምግፋዕ ጥቑዓትን ስለ ልቕሶ መሳኪንን ሕጂ ኽትንስእ፡ ነቲ ዚናፍቖውን ምድሓን ከምጽኣሉ እየ፡ ይብል እግዚኣብሔር” (መዝ 12፡5) ። እግዚኣብሔር ኣብ ዝትንስኣሉ ግዜ ኣብ ቅድሚኡ ደው ክብል ዝኽእል የለን። ክድንጒ ይኽእል ግዜ ክወስድ ይኽእል ግና ብዘይጥርጥር ኣብ መወዳእትኡ ክመጽእ እዩ። ዕራርቦ ጸሓይውን እንተኾነ ክመጽእ እዩ።

ተስፋ ዘለዎ ሰብ መንፈሱ ርጉእ እዩ። ከምቲ ዘማራይ ዳዊት ዝበሎ “ኪቃወመኒ ኢሉ እኳ ሰራዊት እንተ ዚሰፍር ልበይ ኣይፈርህን እዩ፡ ኲናትውን እንተ ዚለዐለኒ እምነት ኣሎኒ” (መዝ 27፡3) ። ፍጹም ዘይነቓነቕ፡ ከውሒ ዝኾነ እምነት። ዝሓዝኩዎ መን ድዩ፤ እግዚኣብሔር እዚ እዩ ቃላቱ ንዓይ ዝሃበኒ፡ “ንሱ ባዕሉ ኣይክሐድካን ዕሽሽውን ከቶ ኣይክብለካን እየ ኢሉ።” (ዕብ 13፡5) ቀጺሉውን “እግዚኣብሔር ኣምላኽካ ንሱ እዩ ምሳኻ ዚኸይድ እሞ ኣይጠልመካን ኣይሓድገካን እዩ” (ዘዳ 31፡6) ። ተስፋስ ኣሎኒ ቆጸራኡ ድማ ቀረባ እዩ። “ኣነ ምሳኻ እየ፡ እቲ ዝበልኩኻ ኽሳዕ ዝገብሮ ኣይሐድገካን እየ እሞ ኣብ እትኸዶ ኹሉ ኽሕልወካ እየ” (ዘፍ 28፡15) ። ሰበይቲ ‘ኳ ንፍረ ኸርሳ እንተረሰዐት “ምንም እኳ ንሳተን እንተ ረስዓ ኣነስ ኣይክርስዓክን እየ” (ኢሳ 49፡15) ። እዚ ዝመሰል ህይወት ተዋሂቡኒ ደኣ እምበር መዓስ ጽዒረሉ፤ ኩሉ ብሰናይ ፍቓዱ እምበር ኣበይ’ከ ኢለዮ። ምስጋና ንልኡል ኣምላኽና ይኹን። “ኹለን ጸጒሪ ርእስኹም እኳ ቑጹራት እየን” (ሉቃ 12፡7) ኢሉኒ ኸሎስ ንምንታይ ደኣ ዝጨነቕ፤ ዝኾነ እንተ ኾነ ዝመጸ እንተ መጸ ኣምላኽ ኣሎ፡ ኣምላኽ ይርኢ ኣሎ ይብል እቲ ንኣምላኽ ዝጽበ። ኩሉ ኣብ ቅድመይ ግብ ዝበለ ጸላማት ወላኳ እንተኾነ ኩሉ ክሓልፍ ኢለ ልበይ ዘይየርግእ። ንኹሉ መወዳእታ ስለዘለዎ እዚ ሽግር’ዚ ከሓልፍ እዩ።

ደቂ እግዚኣብሔር ቀጻሊ ኣብ ተስፋ ይነብሩ። ተስፋ ንዘይብሉ ነገር እንተ ኣጓነፎም ብትዕግስቲ ይጽበዩዎ። ኖ ኖ ኖ ኢሉ ይጅምረልካ እቲ ኣብ ኣምላኽ ዝተወከለ ሰብ፡ ኣምላኽ ደኣ እኮ ስርሑ እዩ ዝሰርሕ ዘሎ። ኣምላኽ በቲ ንሱ ዝፈልጦ መንገዲ እዩ ዝሰርሕ። በቲ ንሕና ንግምቶ ኣይኮነን። ኣብ መወዳእትኡ ጥበብ ኣምላኽ ከመይ ከም ዝኾነ ክትርኢ ኢኻ ይብለካ። ሕጉስ ከኣ ትረኽቦ።

ተስፋ ዘለዎም ኣብ ሓጐስ ይነብሩ። መጽሓፍ ቅዱስ እንታይ ይብል “እንሆ ነቶም እተዐገሱ ብጹኣን እዮም” (ያዕ 5፡11) ። ኩልና ብተስፋ ሕጉሳት ንኹን!!!

ገለ ሰብ ይኣኽለኒ ሕጅስ ሙሟት ይሕሸኒ፡ አገልግሎተይ ጠጠው ከብል፡ ኢደይ ንሓጥያት ክህብ፡ እንታይ እሞ ክጠቕመኒ፡ ሃሊኸ፡ ጠፊአ፡ ኩሉ ዝነበረኒ ኣጥፊአዮ እየ ኢናበለ ዘምርር ሰብ ተስፋ ዝቆረጸ እዩ። ብኣንጻሩ ከኣ “እቶም ንእግዚኣብሔር ዚጽበዩ ግና ሓይሎም ይሕደስ። ከም ንስሪ በኽናፍ ይድይቡ፡ ይጐዩ እሞ ኣይሕለሉን፡ ይኸዱ እሞ ኣይደኽሙን” (ኢሳ 40፡31) ።

 ንዓና ዝተዋህበና ውህብቶ አኮ ፉሉይ እዩ። ፍጹም ኣይድርብየካን ሸለል’ውን ኣይብለካን እየ ካብ በለና ተስፋ ኣይንቆርጽን ኢና። ኢድና ኣይንህብን። ደቂ ኣምላኽ ኣይደኽሙን፡ ዋላ’ኳ እቲ ደጋዊ ስጋና እንተ ፈረሰ ውሽጣዊ ሓይልና መዓልታዊ ይሕደስ። ኣብ ደቂ ሰባት ዘይከኣል ኣብ ኣምላኽ ይከኣል እዩ፡ ብዘይጥርጥር ይኸውን ድማ።

 ምንጪ፡ ስብከት ካብ ዓረበኛ ልሳን ፖፕ ሺኖዳ 3ይ (H.H. Pope Shenouda III) ጸሎቱን በረኸቱን ምስ ኩልና ይኹን ።

(For those who do not have Geez, please try this link) HOPE

ወስብሓት ለእግዚኣብሔር

ወለወላዲቱ ድንግል

ወለመስቀሉ ክቡር

ኣሜን!!!

ቤተ መቅደስ እግዚኣብሔር (6)

በስመ አብ ወወልድ ወመንፈስ ቅዱስ አሃዱ አምላክ አሜን!

ቁጽሪ 7  ኒቆዲሞስ መጋቢት ፳፫/ ሚያዝያ 1  (2004)/2012 ዓ.ም

ኣምላከ ቅዱሳን እግዚአብሔር ጾምና ይባርኸልና።

ናይዚ ሰሙን ጽሑፍ << ኣብ ዙርያ ቤተመቅደስ ዘለዉ ቅዱሳት ሥዕላት ብኽብሪ ምስጋድ። ።>> ትብል እያ። ሠናይ ንባብ።

 ካብ ዝሓለፈ ዝቐጸለ

መ. ኣብ ዙርያ ቤተመቅደስ ዘለዉ ቅዱሳት ሥዕላት ብኽብሪ ምስጋድ።

ኣብ ዙርያ ቤትመቅደስ ኅልናና ናብ እግዚአብሔር ዝመላለሱ ዝተፈላለዩ ቅዱሳት ሥዕላት ኣለዉ። እዚኦም ቅዱሳት ሥዕላት እንተ ኣኽቢርናዮም ወናኒ ናይቲ ሥዕሊ ብምሕሳብ ዝግባእ ክብሪ እንተሂብናዮም ካብ እግዚአብሔርን ቅዱሳኑን ካብ ቅድስቲ ቤተክርስቲያን በረከት ንቅበል።

1. ቅዱሳት ሥዕላት ኣብ መጽሓፍ ቅዱስ

ቅዱሳት ሥዕላት ኣብ ቤተ መቅደስ ክስኣሉ ክቅመጡን ክንሰግደሎም ዝፈቀደ እግዚአብሔር እዩ።

ዘጻ.25፣19 <<ሓደ ኪሩቤል ኣብ ሓደ ወሰን ካልኣይ ኪሩቤል ከኣ ኣብቲ ኻልኣይ ወሰን ግበሮም ነቶም ኪሩቤል ምስቲ  መኽደን መተዓረቒ ሓደ ኾይኑ ብኽልተ ወሰኑ ግበርዎም። እቶም ኪሩቤል ከኣ ንሓድሕዶም ገጽ ንገጽ መሊሶም ኣኽናፎም ልዕል ኣቢሎም ይዘርግሑ። ነቲ መኽደን መተዓረቒ ድማ በኽናፎም ይኸውልዎ ገጽ እቶም ኪሩቤል ናብቲ መኽደን መተዓረቒ የብል። >> ሊቀ ነብያት ሙሴ ኣብ ልዕሊ  መሕደሪ ታቦት  መኽደን መተዓረቒ  ንኽሰርሕ ዝተኣዘዘ ናይ ኪሩቤል ( ናይ ቅዱሳን መልኣኽቲ) ሥዕሊ እዩ። ህዝበ እስራኤል ኣብ ፊት ቅድሚ ታቦቱ ዘለዎ ድንኳን ክሰግዱ እግዚአብሔር  ኣብቲ መኽደን መተዓረቒ  ኣብ መንጎ እቶም ኣብ ልዕሊ ታቦት ምስክር ዘለዎ ክልተ ኣሳእል ኪሩቤል ተገሊጹ የዘራርቦ ኔሩ።

<< ኣቡኡ ድማ ንዓኻ  ክግለጸልካ እየ ካብቲ መኽደን መተዓረቒ ካብ መንጎ እቶም ኣብ ልዕሊ ታቦት ምስክር ዘለዉ ኽልተ ኪሩቤል እቲ ንደቂ እስራኤል ኢለ ዝእዝዘካ ኹሉ ኽነግረካ እየ። >>   ዘጻ.25፣22።

<<     ኣብ ቅድስተ ቅዱሳን ኣብቲ ቤት ራእይ ዓሰርተ እመት ዝቑሞቶም ክልተ ኪሩቤል ካብኦም ኣውሊዕ ገበረ። ……    ነቶም ኪሩቤል'ውን ድማ ብወርቂ ለበጦም። >> 1ይነገ.6፣23።

1ይነገ.6፣29።  <<ኣብ ኩሉ መንደቕ እቲ ቤት ብዙርያ ድማ ብውሽጥን ብግዳምን ናይ ቅርጺ ምስልታት ኪሩቤልን ስየን ክፋት ዕንባባታትን ቀረጸ።>>

ንጉሥ ሰለሙን ቤተ መቅደስ ክሰርሕ ኣብ ውሽጥን ደገን ናይ ቅዱሳን መልኣኽቲ ሥዕሊ ከምዘቅረጸ ኣብ ወርቒ ከምዝለበጦምን ከምዘጌጾምን ንርኢ። እቲ ህዝቢ ናብ ቤተመቅደስ እግዚአብሔር ክሰግድ ከሎ ኣብቲ ቤተመቅደስ ዘለዉ ቅዱሳን ሥዕላትውን  ናይ ጸጋ ስግደት ከምዝሰገደውን ንርኢ።

<<ናይ እስራኤል ኣምላክ እግዚአብሔር ኣብ ልዕሊ ኪሩቤል  ብኽብሪ ተገሊጹ እዩ።>> ብምባል እግዚአብሔር  ብቅዱሳን ሥዕላቱ ኣቢሉ ክብሩ ይገልጽ ከምዝነበረ ተገሊጹ እዩ።

2. <<ዝተቐርጸ ምስሊ ንዓኻ ኣይትግበር። >> ዝበል እንዳንበብና ከመይ ንቅዱሳን ሥዕላት ንሰግድ?

<<ዝተቐርጸ ምስሊ ንዓኻ ኣይትግበር። >> ዝተባህለ << ኣህዛብ ንዘቆምዎ ጣዖት ኣይትስገድ ።>> ንምባል እዩ እምበር ንዝተቐደሰ ሥዕለ ኣድኅኖ ናይ ጸጋ ስግደት ኣይትስገድ ማለት ኣይኮነን። ቅዱሳት ሥዕላት ኣብ ቤት መቅደስ ክሰኣሉ ዝገብረ እግዚአብሔር እዩ። እዚኦም ሥዕለ ኣድኅኖ ኣብ ቤተመቅደሱ ክሰኣሉ ዝገበረ እግዚአብሔር እዩ። እዚኦም ሥዕለ ኣድኅኖ ከም ጣዖት ዝቁጸሩ እንተኾይኖም ሊቐ ነብያት ሙሴ  ።  ዘጻ.25፣22።  ጠቢበ  ንጉሥ ሰለሙን 1ይነገ.6፣23-28።  ኣብ ቤተ  መቅደሱ  ውሽጢ ከቅርጾም  ከሎ  እግዚአብሔርዶ  ስቅ ኣይምበለን። ክብሩ ኣብ ልዕሊ ቅዱሳን ሥዕላትውን ኣይምገለጸን ኔሩ። እግዚአብሔር ኣምላኽና ፍቓዱ ስለ ዝኾነ ኣዚዝዎም። ክብሩ'ውን ገሊጽሎም።

ስለዚ ቅዱሳን ሥዕላት ምስቶም ኣይትስገድሎም ካብ ዝተባህሉ ዝድመር ኣይኮነን።   ዝተቀረጹ ምስሊ (ምስ ጣዖታት) ምስ ቅዱሳን ሥዕላት ርክብ ዝበሃል የብሎምን።

3. ዘይዛረቡ ዘይንቀሳቀሱ ሥዕላት ከመይ ከድኅኑ ወይ ክፍውሱ ይኽእሉ?

እግዚአብሔር ንሰባት ንምድኃን እንካን ኣብ ቤቱ ዝተሳእሉ ቅዱሳን ሥዕላት ካልኦት ግዑዛን ፍጥረታት ክጥቐመሎም ይኽእል እዩ።

ህዝበ እስራኤል ኣብ በረኻ ክጎዓዙ ከለዉ ብበደሎም ምኽንያት መቕሰፍቲ ምስ ረኸቦም ንሊቐ ነብያት ሙሴ  <<  ምስ እግዚአብሔር ዕረቐና፣ ለምለንልና፣ >>  ኢሎሞ። ሙሴ'ውን ንእግዚአብሔር ለሚንሎም። እግዚአብሔር ናይ ሙሴ ልመና ሰሚዑ ፣ ንሙሴ <<  ሙሴ ምእንቲ እቲ ህዝቢ ለመነ ። እግዚአብሔር ከኣ ንሙሴ ዚነድድ ተመን ንዓኻ ግበር ኣብ ባላ ድማ ስቐሎ ኪኸውን ከኣ እዩ፣ እተነኽሰ ዘበለ ናብኡ እንተ ጠመተ ኪሓዊ እዩ። ሙሴ ኸኣ ካብ ኣስራዚ ተመን ንሰብ እንተ ነኸሰ ናብቲ ተመን ኣስራዚ ምስ ዚጥመት ይሓዊ ነበረ።>> ዘኁ.21፣8-9። ኢሉ እግዚአብሔር ኣዚዝዎ። ሙሴ'ውን ከምዝተኣዘዞ ገበረ ህዝበ እስራኤል ካብቲ ዝተኣዘዘሎም መቅሰፍቲ ደሓኑ።

ህዝበ እስራኤል ካብ ግብጺ ወጺኦም ናብ ከንኣን ክጎዓዙ ከለዉ ኣብ መገዶም ባሕረ ኤርትራ ክሳገሩ ነበሮም ።  እቲ ህዝቢ ካብ ፍርሕት ዝተላዕለ ኣግሮምረመ፣ ብድሕሪት ካብ ዝመጾም ናይ ፈርኦን ሰራዊት  ፈርሑ። ኣብቲ እዋን ሙሴ ናብ እግዚአብሔር ምስ ጸለየ  << እግዚአብሔር ድማ ንሙሴ በሎ ስለምንታይ ናባይ እትምህለል ንደቂ እስራኤል ኪጎዓዙ ንገሮም። ንስኻ ድማ በትርኻ ኣልዒልካ ኢድካ ናብ ልዕሊ ባሕሪ ዘርግሕ እሞ ምቐሎ፣ ደቒ እስራኤል ከኣ ናብ ማእከል ባሕሪ ናብቲ ንቑጽ ይእተዉ። >> ። ዘጻ.14፣15። እስራኤላውያን ብእምነት ባሕረ ኤርትራ ንቑጽ መሬት ኮይንሎም ተሳገሩ።

ሙሴ ብዝተሰቅለ ናይ ኣስራዚ ተመን ህዝበ እስራኤል ካብ መቕሰፍቲ ካብ ደኃኑ፣ ኣብ ኢድ ሙሴ ብዝነበረት ግዑዝ በትሪ ባሕሪ ኤርትራ ኣብ ክልተ ካብ ተኸፍለ። ኣብ ውሽጢ ቤተመቅደስ ዘለዉ ቅዱሳን ሥዕላት ካብ በትርን ብኣምሳል ተመን ዝተሰርሐ ናይ ኣስራዚ ተመን ንላዕሊ ክብሪ ከምዘለዎም ከነስተውዕል ይግበኣና። ብኣስራዚ ተመንም ብናይ ሙሴ በትሪ ተኣምራት ዝገበረ እግዚአብሔር ኣብ ልዕሊ ቅዱሳን ሥዕላት ሓዲሩ ዘደንቅ ስርሑ ንኸይገልጽ ዝኽልክሎ መን እዩ።

<<ኣምላኽ ብኢድ ቅዱስ ጳውሎስ ብዙሕ በይኑ ዝኾነ ተኣምራት ገበረ። መኣረምያኡ ወይስ ክዳኑ ካብ ዝባኑ ወሲዶም ኣብቶም ሕሙማት የንብሩ እሞ ሕማሞም ይሓድጎም ርኹሳት መናፍስቲ'ውን ካባታቶም ይወጹ ነበሩ። >> ግ.ሓዋ.19፣11-12። ቅዱስ ጳውሎስ ብዝለበሶ ልብሲ ብዙሓት ኣጋንንቲ ወጺኦም እዮም።

ቅዱስ ጴጥሮስውን ብጽላሎቱ ይፍውስ ኔሩ እዩ።  << ቅዱስ ጴጥሮስ ኪሓልፍ  ከሎ ጽላሎቱ  ኣብ ገሊኦም ምእንቲ ኺወድቕ ኢሎም።

ንሕሙማት ኣብ ዓራትን ኣብ ቃሬዛን ገይሮም ተሰኪሞም ናብ ኣደባባይ የውጽእዎም ነበሩ ። >> ግ.ሓዋ.5፣15። እሞ ድኣ ብናይ ቅዱሳን ሓዋርያት ቁራጽ ክዳንን ብጽላሎቶምን ከምዚ ዝበለ ተኣምራት ካብ ዝተገብረ ፣ ኣብ ውሽጢ ቤተመቅደስ ዝተሳእሉ ቅዱሳን ሥዕላት ተኣምራት እንተሰርሑ ከመይ ይደንቀናን ይገርመናን ?  ስለዚ ናይ እግዚአብሔር ኃይልን ጥበብን ማዕረ ክንደይ ረቂቕ ምዃኑ ኣብዚ'ውን ንርዳእ ኢና።

ቅድስቲ  ቤተክርስቲያና  ኣምላኽና እግዚአብሔር ብዝኣዘዘና መሰረት ናይ ኣምልኾ ስግደት ንዕኡ ንፈጣሪና ኣምላኽና መድኃኒና ኢየሱስ ክርስቶስ ንሰግድ ። ዘወትር ከምቲ ኣብ ጸሎትና ንሰግድ ንአብ ለወልድ ለመንፈስ ቅዱስ አሐዱ ስግደተ ንብል። ናይ ኣምልኾ ስግደት እዩ። እዚ ከኣ ፈጣሪና መጋቢና ሓላዊና ስለዝኾነን ካብ ዘይምንባር ናብ ምንባር ዘምጸኣና፣ ስጋብ ኣብ መስቀል ቀራንዮ ስለና ኢሉ ደሙን ሥጋኡን ዘፍሰሰልና ፍቕሩ ብተግባር ዝገለጸልና ኣምላኽ ስለዝኾነ ንዑኡ ጥራሕ ናይ ኣምላኾ ስግደት ንሰግድ።

ንቅድስቲ ቤተክርስቲያን ንቅዱሳን ሥዕላት ከኣ ናይ ጸጋ ስግደት ፣ ትሰግደሎምን ተኽብሮምን።

ኣምላከ ቅዱሳን እግዚአብሔር በረከቱን ረዲኤቱን የብዝሓልና። ወላዲተ አምላክ ቅድስተ ቅዱሳን ድንግል ማርያም ብኣማላድነታ ኣይትፈለየና።

For those who do not have Geez, please check this PDF link) BETE MEKDES EGZIABHER (6)

ወስብሐት ለእግዚአብሔር።

ወለወላዲቱ ድንግል።

ወለመስቀሉ ክቡር!